РФ Бэрэсидьиэнин көмөлөһөөччүтэ Жатайдааҕы суудунаны тутар собуот кэскилин сыаналаата

РФ Бэрэсидьиэнин көмөлөһөөччүтэ уонна РФ Муоратааҕы кэллиэгийэтин бэрэссэдээтэлэ Николай Патрушев Ил Дархан Айсен Николаевы кытта Жатайдааҕы суудунаны тутар собуокка сырыттылар.

Николай Патрушев өрөспүүбүлүкэ уонна собуот салалталарын кытта тэрилтэ сайдар кэскилин уонна инникитин сакаас төһө киириэҕин дьүүллэстилэр. Сунтаар улууһугар анаан паром оҥоһулла турар сиригэр, полотницалары хомуйар сиргэ, собуот стапелыгар сырыттылар. Ону тэҥэ киниэхэ эрэгийиэн тыатын хаһаайыстыбатыгар наадалаах кыра баарсалар тутулла туралларын көрдөрдүлэр.

Бэрэсидьиэн көмөлөһөөччүтэ Өлүөнэ өрүскэ уонна РФ Арктика зонатыгар таһаҕаһы таһар суудуналары тутууга сакаас элбиирэ наадалааҕын тоһоҕолоон бэлиэтээтэ.

Сүрүн эбийиэктэр үлэҕэ киирбиттэр: 18,6 тыһ. кв.м. иэннээх “Слип” тутуу уонна 17,8 тыһ. кв. м. иэннээх куорпустары оҥорон таһаарар блок. 58,3 тыһ. кв. м. иэннээх тутар-таҥар комплекс  тутуллан бүтэн, үлэҕэ киириэн иннинээҕи бүтэһик бэрэбиэркэтин ааһа сылдьар. 1300 кв. м. тахса иэннээх туспа турар таможеннай ыскылааттар тутуллубуттар.

Күн бүгүн “ЛОРП” ПАУо сүрүн суудунатын — өрүс-муора кылаастаах RDB 01.05.M аалын бырайыактыыр докумуоннара түмүктэммит. Бу бырайыагынан тутууну саҕалыыр туһунан кэпсэтии бара турар. Эбии сакааһы ылыы кэскилин дьүүллэһэллэр. Собуот сылга өрүс-муора кылаастаах 10 суудунаны оҥорон таһаарар кыахтаах. Инникитин Arc4 уонна Arc5 арктическай кылаастаах суудуналары тутуу, ону тэҥэ Arc6–Arc7 кылаастаах суудуналарга анаан узеллары уонна конструкциялары оҥоруу былааҥҥа турар. Эрэгийиэн 2035 сылга диэри 283 суудунаҕа наадыйара сабаҕаланар.

Бу соругу ситиһэргэ тэрилтэ аныгы, үрдүк технологиялаах тэриллэри туруорбут: ыстаныактары, пресстары, гильотиннай кыптыыйдары, үүттүүр, токарнай ыстаныактары, о.д.а. 60 туоннаҕа диэри көтөҕөр кыахтаах 28 кыраан таҥыллыбыта, ол иһигэр 50 туонналаах кантователь-кыраан.

Мууһу хайытан айанныыр суудунаҕа анаан 8 миэтэрэ усталаах, 2 миэтэрэ кэтиттээх уонна 300 мм халыҥнаах тимир лиистэри оҥорор кыахтаах тиэхиньикэнэн хааччыллыбыттар.

Улахан болҕомто каадырдары бэлэмнээһиҥҥэ ууруллар. СӨ Үөрэҕин министиэристибэтэ, Жатайдааҕы техникум Балтийскай собуоту, Онежскай собуоту уонна «АК Барс» суудунаны тутар корпорацияны кытта бииргэ үлэлэһэллэр. Устудьуоннар бөдөҥ собуоттарга стажировканы ааһаллар, үчүгэй исписэлиистэр баазалара тэриллэр. Үлэһиттэргэ анаан 106 кыбартыыралаах тоҕус этээстээх дьиэ тутулунна, 200 миэстэлээх уопсай дьиэ тутуута түмүктэнэн эрэр.

Жатайдааҕы собуот тутуутун бырайыага Дьокуускай агломерациятын уһун болдьохтоох кэлим сайдыытын былааныгар киирбитэ. Иккис түһүмэх үбүлээһинэ 9,552 млрд солк. тэҥнэһэр,  бырайыактыыр-сметнай докумуоннарын оҥоруу түмүктэнэн эрэр. Докумуон сыл бүтүөр диэри судаарыстыбаннай эспэртиисэҕэ киириэҕэ. Иккис түһүмэх үлэҕэ киирдэҕинэ, автоматизация көмөтүнэн суудунаны тутуу түргэтиэҕэ уонна собуот оҥорон таһаарыыта 20% диэри үрдүөҕэ,  диэн иһитиннэрэр Ил Дархан, бырабыыталыстыба пресс-сулууспата.