РФ генеральнай борокуруорун солбуйааччы Дмитрий Демешин Хатаска саҥа оскуолаҕа сырытта

Саха сиригэр үлэтинэн кэлэ сылдьан, РФ генеральнай борокуруорун солбуйааччы Дмитрий Демешин СӨ Ил Дарханын Айсен Николаевы кытта Хатаска П.Н. уонна Н.Е.Самсоновтар ааттарынан орто оскуолаҕа сырытта. 

Арассыыйа Бэрэсидьиэнэ Владимир Путин көҕүлээбит «Үөрэх» национальнай бырайыак иитинэн тутуллубут оскуола 2023 сыл ахсынньы 25 күнүгэр үлэҕэ киирбитэ. Оскуола дириэктэрэ Николай Слепцов РФ генеральнай прокурорун солбуйааччы Дмитрий Демешины уонна СӨ Ил Дарханын Айсен Николаевы үөрэнэр кабинеттарынан, сүрүн сирдэринэн сырытыннарда.

—Биһиги тутааччылары кытта дизайн-бырайыакка хайдах үлэлээбиппитин, учууталлары кытта технологическай тэриллэр испииһэктэрин оҥорбуппутун кэпсээбиппит, — диэн бэлиэтиир оскуола дириэктэрэ.

Дмитрий Демешин үлэни үрдүктүк сыаналаата уонна маннык оскуолалар өрөспүүбүлүкэ, Уһук Илин киэн туттуутунан буолалларын бэлиэтээтэ.

Хатас орто оскуолатыгар 1063 оҕо үөрэнэр. Биэс тыһ.кв.м. иэннээх үс мэндиэмэннээх оскуолаҕа аныгы үөрэтэр эйгэ тэриллибит. Бастакы мэндиэмэҥҥэ П.П.Федорова аатынан агро-инжиниринговай киин баар, манна мастарыскыай, массыынаны, тыраахтары үөрэтэр хостор, агротехнология кабинета, биисинэскэ, урбааҥҥа уһуйар хостор, остолобуой уонна мэдиссиинэ хоһо бааллар.

—Биһиги оскуолабыт киэҥ-куоҥ. Ааныгы дизайнынан оҥоһуллубута олус үчүгэй. Өссө кыһамньылаахтык, үчүгэйдик үөрэниэхпин баҕарабын, — диэн этэр 7  кылаас үөрэнээччитэ Дарья Реева.

—Урут маннык үчүгэй кабинеттар суохтара. Холобур, билигин кылааспытыгар сенсорнай экраннаахпыт, наушниктардаахпыт уонна аактабай саалаҕа улахан экран баар, — диир 5 кылаас үөрэнээччитэ Баир Иванов.

Оскуола иккис мэндиэмэнигэр лингафоннай хос, 140 миэстэлээх аактабай саала, успуорт саалата бааллар. Үһүскэ естественнэй-научнай хайысхалаах анал хостор, бибилэтиэкэ, кыһыҥҥы оранжерея, киинэ-хаартыска устуудьуйата болҕомтону тардаллар.

СӨ Ил Дарханын уонна Бырабыыталыстыбатын пресс-сулууспата

Хаартыскаларга Андрей Сорокин түһэриитэ, СИА