РФ сэнээтэрэ Сахамин Афанасьев Өймөкөөн улууһун олохтоохторун сытыы боппуруостарын быһаарсар

Өймөкөөн улууһугар уһун кэмнээх ардахтартан сорох нэһилиэнньэлээх пууннар ууга барбыттарынан сибээстээн, балаҕан ыйын саҥатыгар Өймөкөөн, Хара-Тумул уонна Биэрэк Үрдэ нэһилиэктэригэр улуустааҕы таһымнаах Сэрэтии үрдүк эрэсиимэ олохтоно сылдьыбыта.

РФ сэнээтэрэ Сахамин Афанасьев быйыл балаҕан ыйын 6 күнүгэр СӨ Бырабыыталыстыбатын бэрэссэдээтэлигэр К.Е. Бычковка официальнай сурук (№ 17-03.345/СА) ыыппыта: “Күндү Кирилл Евгеньевич! Миэхэ Өймөкөөн улууһун Өймөкөөн  нэһилиэгин олохтооҕо Васильева Тамара Егоровна сибээскэ тахсан, уһун ардахтан сылтаан хас да ыал тиэргэнэ ууга барбытын, нэһилиэккэ уустук балаһыанньа олохтоммутун иһитиннэрдэ. Нэһилиэк олохтооҕо билигин да, ардах уһуннук түстэҕинэ, Индигиир өрүскэ уу таһыма күүскэ үрдүүрүн бэлиэтээтэ. Оччотугар улахан халаан тахсан,  олорор дьиэ сектора уонна социальнай эбийиэктэр ууга барар кутталлаахтар. Бу балаһыанньаны тус хонтуруолга ылан, Өймөкөөн оройуонугар халаан содулун срэтиигэ, тахсыбыт хоромньуну толуйууга үлэлэһэр Правительственнай хамыыһыйаны ыытан, балаһыанньаны олохтоохтук билсэргэр, үөрэтэргэр көрдөһөбүн”.

Бу боппуруос быһаарыллыыта РФ сэнээтэрин хонтуруолугар турар. Сахамин Афанасьев Ил Түмэҥҥэ Халыма-Индигир уокуругун дьокутаатынан үлэлии сылдьыаҕыттан  быыбардааччыларын туруорсууларын кытта өрүү үлэлэһэр. Билигин төһө да РФ сэнээтэрэ дуоһунаһыгар үлэлээтэр, Сахамин Афанасьев быыбардааччылара туруорсар кэккэ сытыы боппуруостарын оннуттан хамсатар соруктааҕын истэ, көрө-билэ сылдьан, Өймөкөөн улууһун олохтоохторо киниэхэ махталлара сүҥкэн, эрэллэрэ улахан.