РФ Силиэстийэлиир кэмитиэтин бэрэссэдээтэлэ Александр Бастрыкин Чульмаҥҥа өлбүт оҕо аҕатын кытта көрүстэ

РФ Силиэстийэлиир кэмитиэтин бэрэссэдээтэлэ Александр Бастрыкин Чульмаҥҥа ыттар саба түһүүлэриттэн сылтаан соһумардык өлбүт  12 cаастаах кыыс аҕатын кытта көрүстэ.

Чульмаҥҥа бэйдиэ сылдьар ыттар саба түһүүлэриттэн сылтаан оскуолаттан дьиэлээн испит 12 саастаах кыысчаан суорума суолламмыта. Иэдээннээх  быһылаан туһунан сонун бүтүн өрөспүүбүлүкэни тилийэ көппүтэ. Кыыс аҕата РФ СК бэрэссэдээтэлэ Александр Бастрыкины көрсөргө быһаарыммыта.

Бастрыкин аҕаны кытта видео-сибээс нөҥүө кэпсэппиттэр. Кини үлэ хаамыыта мөлтөҕүн кириитикэлээбит уонна бэйдиэ сылдьар ыттар дьоҥҥо саба түһүүлэрэ бүтүн дойду үрдүнэн кутталынан суоһуурун бэлиэтээбит. Кини бу дьыаланы сиһилии силиэстийэлииргэ, буруйдаахтары эппиэтинэскэ тардарга дьаһайбыт.