РФ успуорка министиэристибэтэ «Уһук Илин уулуссата» быыстапкаҕа кыттыа

Арассыыйа успуорка министиэристибэтэ пуорум иитинэн «Уһук Илин уулуссата» быыстапкаҕа кыттыа.

Илиҥҥи экэнэмиичэскэй пуорум — 2024 (ВЭФ) успуорка киининэн Арассыыйа успуорка министиэристибэтин павильоннара буолуохтара. Бу «Уһук Илин уулуссата» быыстапкаҕа аһыллыахтара.

Үгэс курдук икки былаһаакканан:  «Успуорт — олох нуормата» уонна «ГТО түһүлгэтэ» туруоруллуохтара. Быыстапканы тэрийээччи —  Уһук Илин ФУо РФ Бэрэсидьиэнин боломуочуйалаах бэрэстэбиитэлин аппараатын өйөбүлүнэн Росконгресс пуондата буолар.

—Успуорт — ситиһиилээх уонна чэгиэн киһи олоҕун биир сүрүн аргыһа. Арассыыйа успуорт державатынан мэлдьи буолар. Ол эрээри, успуорт — ситиһии эрэ туһунан буолбакка, бу киһи бэйэтин туһунан буолар. Успуорка кылаабынайа – бэйэ майгытын, тулуурун уонна тулалыыр дьоҥҥо ытыктабыллаах сыһыаннаах буоларга иитии. Биһиги билигин үүнэр көлүөнэни иитиигэ, чэгиэн буолуу, доруобуйа, күүстээх санаалаах, дьулуурдаах буолуу туһунан элбэхтик этэбит. Успуорт тулуурдаах, дьулуурдаах буоларга, бэрээдэги тутуһар буоларга уонна ыарахаттары туоруурга үөрэтэр. Бу бэйэ кыаҕын бэрэбиэркэлээн көрүү буолар. Маннык хаачыстыбалар чопчу спортивнай ситиһиилэри оҥорорго, күүстээх буоларга эрэ туһуламматтар. Бу туох ханнык иннинэ, кини судургута суох усулуобуйаҕа хайдах эрчиллэрин уонна туруоруллубут соруктары хайдах быһаарарга үөрэнэрин ирдииллэр, — диэн бэлиэтиир РФ Бырабыыталыстыбатын бэрэссэдээтэлин солбуйааччы – Уһук Илиҥҥи федеральнай уокурукка  РФ Бэрэсидьиэнин боломуочуйалаах бэрэстэбиитэлэ Юрий Трутнев.

Успуорт министиэристибэтин истиэндэлэригэр успуордунан идэтийэн дьарыктанар да, көннөрү сөбүлээн дьарыктанар да дьоҥҥо Уһук Илиҥҥэ успуордунан дьарыктаныы кыаҕын көрдөрүөхтэрэ.

«Успуорт — олох нуормата» павильон  профессиональнай уонна маассабай спорт кэскилин, норуоттар икки ардыларынааҕы бииргэ үлэлээһин, успуорт тэрээһинин көрүҥнэрин уонна да атын боппуруостары дьүүллэһии былаһааккатынан буолуоҕа.  Дьыалабыай сиэссийэлэр уонна кэмпириэнсийэлэр былааннаналлар. Ыалдьыттар Арассыыйа успуордун кэскилин, саҥа көрүҥнэрин, спортивнай федерацияларын, үрдүк үөрэх кыһаларын уонна оскуолалары, бэлэмнэнии кииннэрин, ону тэҥэ Арассыыйа спортсменнарын ситиһиилэрин билсиэхтэрэ.

«ГТО түһүлгэтэ» павильоҥҥа «ГТ оонньуута» Уһук Илин аһаҕас кубога үһүс төгүлүн ыытыллыа.Манна Уһук Илин эрэгийиэннэрин оҕолорго уонна улахан дьоҥҥо уон биир хамаандата  кыттыаҕа. Ону сэргэ, Арассыыйа бары муннугуттан күүстээх профессиональнай спортсменнара кытталлара күүтүллэр.  Кыттааччыларга араас тургутан көрүүлэр бэлэмнэниллибиттэр. Манна лазернай бистэлиэттэн ытыы, икки км. диэри сүүрүү, мэһэйдэри туорааһын, тыыны тутан баран ууга киирэн олоруу, мэдиссиинэ көмөтүн оҥоруу, уо.д.а. бааллар.

Илиҥҥи экэнэмиичэскэй пуорум балаҕан ыйын 3–6 күннэригэр Владивостокка Уһук Илин федеральнай университет кампуһун былаһааккатыгар буолар. Бу күннэргэ «Уһук Илин уулуссата» быыстапкаҕа пуорум кыттыылаахтара сылдьыахтарын сөп, балаҕан ыйын 7-8 күннэригэр быыстапкаҕа ким баҕалаах сылдьыан сөп.