Риэлтор суох үс учаастагы 3 мөл.солк. атыылаан сууттанна

Былырыын олунньуга Дьокуускай куорат олохтооҕо тылынан кэпсэтэн, «Сатал» түөлбэҕэ үс сир учаастагын атыылаһан, буруйдаахха 3 мөл. солк. биэрбит. Бу чахчы расписканан бигэргэнэр. Ол туһунан СӨ Үрдүкү Суутун пресс-сулууспата иһитиннэрэр.

Кэлин риэлтор атыылаабыт сирдэрэ кини бас билиитэ буолбатахтара, оттон өрүттэр икки ардыларыгар атыылааһын дуогабара түһэрсиллибэтэҕэ биллибит. Атырдьах ыйыгар эмсэҕэлээччи суох учаастактарын иһин төлөөбүт харчытын төннөрөр туһунан ирдэспит. Ол эрээри буруйдаах харчыны төннөрөртөн аккаастаммыт, харчыны сир учаастактарын туһаныы быраабын иһин ылбытынан быһаарбыт. Ити кэннэ эмсэҕэлээччи суукка ирдэбил суруйбут.

Ирдэбил сайабылыанньатыгар дьахтар суутунан буруйдаахтан төрүөтэ суох атын киһи харчытынан туһаммыт иһин бырыһыаны уонна суут ороскуотун ирдэспит. Дьокуускайдааҕы куорат суутун быһаарыытынан буруйдаахтан 3 000 000 солк., атын киһи харчытын туһаммытын иһин 309 918 солк. бырыһыан, 47 169 солк. кээмэйдээх госпошлина төлөбүрүн ороскуота уонна бэрэстэбиитэлгэ 40 000 солк. суут ороскуота ирдэннэ. Буруйдаах бу быһаарыыны көтүрэргэ СӨ Үрдүкү суутугар ыыппыт, ол эрээри Үрдүкү суутун гражданскай дьыалаларга  кэллиэгийэтэ суут быһаарыытын уларытарга эбэтэр көтүрэргэ төрүөт булбата. Быһаарыы сокуоннай күүһүгэр киирдэ.