Роботтар тыа хаһаайыстыбатын салаатыгар үлэһиттэри солбуйуохтара

Кэлиҥҥи көлүөнэ роботтар тыа хаһаайыстыбатыгар үлэһиттэри солбуйуохтара. Алтынньы 8 күнүгэр «Көмүс күһүн» быыстапка пленарнай мунньаҕар РФ премьер-миниистирэ Михаил Мишустин иһитиннэрбитинэн, түөрт сылынан агробырамыысыланнай комплекс тэрилтэлэрин 80%-тан итэҕэһэ суох сыыппара технологияларын туһанар буолуохтара.

Эспиэрдэр этэллэринэн, маннык сайдыы экэниэмикэ салаатыгар инвестицияны тардыыны үрдэтиэҕэ уонна дойдуга экспортка саҥа кыахтары арыйыаҕа.

«Тимирязев Киинэ» былаһааккаҕа аһыллыбыт быыстапка сүрүн тиэмэтэ – аграрнай салааны сыыппараҕа көһөрүү буолар. Инновация зоната ыалдьыт ахсаанынан саамай элбэх. Быыстапка биир саамай чаҕылхай эспэнээтинэн үүт бородууксуйатын оҥорор хампаанньа бырамыысыланнай робота буолла. Бу тэрил араас сенсордары туһанан табаар упаковкатын булар, онтон вакуумнаах мэхэньииһим көмөтүнэн сэрэнэн ылан, атын сиргэ көһөрөр. Биир маннык робот аҕыс киһи үлэтин солбуйар кыахтаах.

Өссө биир технология – ынахтарга аналлаах «өйдөөх» моойторук, ону оҥорооччулар оонньоон «фитнес-браслет» диэн ааттыыллар. Бу тэрил сүөһү доруобуйатын туһунан бары наадалаах иһитиннэриилэри хомуйар. Бу браслеттары Сергиево-Посадскай куораттааҕы уокурукка баар пиэрмэҕэ туһаныахтара.