Роман Щегельняк: «Олоҥхо ыһыаҕар «Аярган» эпос матыыбынан бырагыраама көрдөрүллүөҕэ»

Бырагырааманы Нерюнгри куорат уонна Нерюнгри оройуонун 50 сыллаах үбүлүөйүнэн тэриллибит ураты култуурунай-гастрономическай тэрээһини саха аһын флагмана «Тыгын Дархан» эрэстэрээн бэлэмнээтэ. Тэрээһин соҕуруу Саха сирин тыынын уонна историятын кэрэһилээн, үрдүк таһымнаах аһы, тыйаатыр ускуустубатын уонна төрүт олохтоохтор үгэстэрин дьүөрэлиир.

«Аныгы, аан дойдуга түргэнник уларыйа быһыыга-майгыга  биһиги култуурунай уратыбытын  харыстыырбыт уонна сайыннарарбыт ордук суолталаах. Итиннэ дьулуһуу бэлиэтинэн «Аярган» буолар. Бу ас-үөл эрэ бырааһынньыга буолбатах,  биһиги сомоҕолоһуубутун, кэлэр көлүөнэлэргэ үгэс тыынын уонна саҥа кэм кынаттааһынын тиэрдэр истиҥ баҕабытын, урукку, билиҥҥи уонна кэлэр кэм ураты дьүөрэлэһиитин кэрэһэлиир», — диэн Нерюнгри оройуонун баһылыга Роман Щегельняк бэлиэтээтэ.

«Аярган. Чох сүрэҕэ, сир тыына» —  ис ситимнэри бөҕөргөтөр, Нерюнгри оройуонун тас эйгэҕэ баай нэһилиэстибэлээх уонна кэлэр кэмҥэ аныгылыы көрүүлээх оройуон быһыытынан билиһиннэрэр кыахтаах култуурунай дипломатия күүстээх үнүстүрүмүөнэ буолар.

«»Аярган» гастро-киэһэтин сыала — Нерюнгри оройуонун олохтоохторун уонна ыалдьыттарын култуура баайын уонна араас өрүтүн көрдөрөр амтан, дорҕоон уонна уобарас нөҥүө түмэр дириҥ иэйиилээх санааны үөскэтии. Бу тэрээһин биир сомоҕо буолуу, төрөөбүт дойдунан киэн туттуу санаатын бөҕөргөтөргө уонна салгыы култуурунай саҕалааһыннары сайыннарарга кынаттыырга аналлаах», — диэн СӨ Ил Дарханын уонна Бырабыыталыстыбатын дьыалатын управлениетын салайааччыта, «Тыгын Дархан» үлэтин куратордыыр уонна саҥа бырайыактар ааптара Иван Лазарев бэлиэтээтэ.

«Аярган. Чох сүрэҕэ, сир тыына» диэн аат дириҥ бэлиэ суолталаах:

• Аярган — бу эбэҥки номоҕун дьоруойун түмэр уобараһа, тылбааһа «Бастыҥтан бастыҥ» диэн. Гастро-киэһэ сценарийын оҥорорго тэрийээччилэр төрүт олохтоохтор номохторуттан кынаттанан, кини хайдах ситэрин-хоторун уонна бултуу барарын көрдөрөр кыра быһа тардыыны көрдөрөргө быһаарыммыттар. Гастро-киэһэҕэ Аярган Нерюнгри оройуонун ураты тыынын уонна историятын  кэрэһилиир.
• Чох сүрэҕэ — куорат бырамыысыланнай олугун, хайа үлэһиттэрин төрүттэрин уонна олохтоохтор үлэҕэ хорсун быһыыларын бэлиэтиир.
• Сир тыына — оройуон айылҕатын баайын, кини култуурунай нэһилиэстибэтин уонна тулалыыр эйгэни кытта духуобунай ситимин көрдөрөр.

Диана Сивцева