Росгвардия: Гостиницаҕа эр дьон счету төлүүртэн аккаастаммыттар, айдаан тардыбыттар

Саха сиригэр ааспыт нэдиэлэҕэ Росгвардия үлэһиттэрэ киин куорат араас сынньанар тэрилтэлэринэн суһал сигналынан ыалдьыттар айдаан тардыбыттарын, малы-салы алдьаппыттарын, төлөбүртэн аккаастаммыттарын, охсуһууну тэрийбиттэрин тохтоппуттар. Бу туһунан Росгвардия Саха сиринээҕи управлениетын пресс-сулууспатыгар иһитиннэрдилэр.
Ол курдук, Дьокуускай биир гостиницатыгар икки эр киһи 13 тыһ. солк. суумалаах счету төлүүртэн аккаастанан айдаан тардыбыттар. Росгвардеецтар эр дьону быһаарса полицияҕа илдьибиттэр.
Өссө биир ыҥырыы ресторантан киирбит. Онно икки итирик киһи атын ыалдьыттары кытта охсуспуттар. Ону таһынан Росгвардия үлэһиттэригэр утарыласпыттар.
Дьокуускайга өссө биир сынньанар-аралдьытар тэрилтэҕэ дьахтар айдаан тардыбыт, сиэркилэни алдьаппыт. Хоромньу суумата 25 тыһ. солк. буолбут.
Оттон өссө биир атын аралдьытар тэрилтэҕэ эр киһи туалет кабинкатын уонна унитааһы алдьаппыт, ол кэнниттэн 30 тыһ. солк. материальнай хоромньуну төлүүртэн аккаастаммыт. Итини кытта алдьаммыт микрофон сыанатын караоке-бар биир ыалдьыт дьахтара төлүүртэн аккаастаммыт.
Ньурбаҕа Пушкин аатынан уулуссаҕа киһини кырбааһыҥҥа уорбаланар эр киһини тутан полицияҕа илдьибиттэр.
Ааспыт нэдиэлэҕэ Росгвардия управлениетын үлэһиттэрэ уопсайа 92 киһини административнай сокуону кэһии иһин туппуттар.
Сообщить об опечатке
Текст, который будет отправлен нашим редакторам: