Росгвардия ханнык түгэннэргэ саа былдьанарын санатта

Сааны бас билээччилэр федеральнай сокуонунан көрүллэр быраабылалары кытаанахтык тутуһуохтаахтар, диэн Росгвардия пресс-сулууспата санатар.

Гражданин ханнык эмэ буруйу оҥордоҕуна, саата былдьанарын өйдүөх тустаах. Ол кэһиилэр үксүгэр сааны кытта сибээһэ суох да буолуохтарын сөп. Дьонтон сокуоннайдык бас билэр сааларын былдьыырга төрүөт буолар испииһэк федеральнай сокуоҥҥа чопчу ыйыллан турар.

Ол курдук, сааны итирик туруктаах сылдьан тутуннаҕына, сааны харайыы эбэтэр туһаныы быраабылатын кэстэҕинэ, лиссиэнсийэтэ эбэтэр көҥүлэ сотулуннаҕына, ону таһынан бас билээччи өлбүт түгэнигэр былдьанар.

Оттон лиссиэнсийэни сотууга элбэх төрүөт баар. Олортон биирдэстэрэ — биир сыл иһигэр уопсастыбаннай бэрээдэги уонна куттал суох буолуутун кэһэр эбэтэр бэрээдэгин утарар административнай эппиэтинэскэ хаста да тардыллыы.

Ону сэргэ, административнай  миэрэ быһыытынан сааны бас билээччилэр лиссиэнсийэлэриттэн уонна көҥүллэриттэн маталлар. Онно киирсэллэр: мунньаҕы, миитини, демонстрацияны, хаамыыны эбэтэр пикети тэрийии эбэтэр ыытыы бэрээдэгин кэһии; уопсастыбаннай бэрээдэги кэһиигэ тиэрдиии, дьону уопсастыбаннай миэстэлэргэ элбэх буолан бииргэ мунньуу уонна (эбэтэр) хамсааһыннарын тэрийии.

Үөһэ ааттаммыт түгэннэргэ лиссиэнсийэни уонна көҥүлү сотуу РФ сокуонугар олоҕуран ыытыллар. Ол кэннэ Росгвардия лиссиэнсийэни-көҥүлү биэрэр үлэтин үлэһиттэрэ бас билээччиттэн саатын былдьыыллар.