Росгвардия: охсуһуу, айдаан, төлөбүртэн куотунуу

Ааспыт нэдиэлэ устата Саха сиринээҕи Росгвардия харабылын үлэһиттэрэ харабылланар эбийиэктэртэн киирбит иһитиннэриилэринэн 84 быраабы кэһээччини туттулар.

Дьокуускайга Росгвардия үлэһиттэрэ Чайковскай уулуссаҕа баар аһыыр сиргэ охсуһууну тэрийбит уонна 15 000 солкуобайга хоромньуну оҥорбут икки айдаанньыты туттулар.

Ону таһынан, өрөспүүбүлүкэ киин куоратыгар аралдьыйар-сынньанар сир аттыгар киһини кырбаабыт сокуону кэһээччи тутулунна. Эмсэҕэлээбит киһи ойоҕоһун уҥуоҕа тостон, балыыһаҕа киирдэ.

Маны таһынан, Дьокуускайдааҕы эрэстэрээннэртэн биирдэстэригэр 10 000 солкуобайдаах төлөбүрү оҥорортон куотуммут уонна администраторы кырбаабыт икки ыалдьыттан биирдэстэрин Росгвардия үлэһиттэрэ туттулар. Тутуу кэмигэр утарсыбытын иһин 27 саастаах быраабы кэһээччи административнай эппиэтинэскэ тардылынна.