Хаҥаласка Росгвардия үлэһиттэрэ рейдэ кэмигэр 3 булт саатын былдьаабыттар

Хаҥалас оройуонугар бултуур сирдэринэн рейдэ кэмигэр ОМОН «Бизон» Росгвардия үлэһиттэрэ, Экология министиэристибэтин булт иниспиэктэрдэрэ, Илиҥҥи Сибиир территориальнай управлениетын балыктааһын эйгэтигэр дуоһунастаах сирэйдэр 7 административнай сокуону кэһиини регистрациялаатылар. Бу туһунан Росгвардия пресс-сулууспата суруйар.

Булт сирдэринэн биир күннээх рейдэ кэмигэр 11 булчут бэрэбиэркэлэннэ. Саха сиригэр 3 булт саата уонна 19 устуука ботуруон былдьанна, 4 административнай боротокуол оҥоһулунна. Булчуттар сааны харайыы быраабылатын кэспиттэр, ол иһин административнай ыстараапка тардыллаллар эбэтэр 6 ыйтан 1 сылга диэри болдьоххо сааны бас билэр бырааптара быһыллар. Холобур, рейс кэмигэр иниспиэктэрдэр «Каракат» снегоболотоходу тохтоппуттар уонна булчуттан чехола суох ботуруоннаах иитиллэ сылдьар сааны былдьаабыттар.

Иниспиэктэрдэр бултааһын быраабылатын 3 кэһиини булбуттар, 2 «Hunterhelp» фирма электроманогу уонна 26 хаас мончуугу былдьаабыттар.

Маннык холбоһуктаах дьаһаллар сааны харайыы, булт, балыктааһын быраабылаларын кэһии, баһаартан сэрэхтээх буолуу уонна айылҕаны харыстааһын сокуоннарын кэһиини туоратар туһугар ыытыллаллар.