Роскомнадзор «Roblox» оонньуу үлэтин хааччахтаата

Роскомнадзор быһаарыытынан уонна төрөппүттэр көрдөһүүлэринэн Арассыыйаҕа мөлүйүөнүнэн оҕо сөбүлээн оонньуур онлайн-платформата «Roblox»  үлэтэ хааччахтанна.

Роскомнадзор оонньуу дойду иһинээҕи сибээһин хааччахтаата. Бу дьаһал платформа иһигэр сокуону кэһэр иһитиннэриилэр киэҥник тарҕаммыттарын кытта сибээстээх.

Кэнники күннэргэ Арассыыйа, ол иһигэр Саха сирин олохтоохторо «Roblox» оонньууга киирэллэригэр улахан уустуктары көрсөр буоллулар. Билигин ити мэһэйдэр төрүөтэ билиннэ — судаарыстыба оҕолору кутталлаах контентан харыстыыр сыалтан дьаһал ылан эрэр.

Бобуу төрүөтэ тугуй?

Роскомнадзор иһитиннэрэринэн, «Roblox» платформатыгар маннык сокуону кэһиилэр тахсыбыттар:

• Экстремистическэй уонна террористическай дьайыылары өйүүр, хайгыыр матырыйааллар;
• Күүһүлээһиҥҥэ ыҥырыылары тарҕатыы;
• ЛГБТ*-тематиканы пропагандалааһын (* — бу хамсааһын Арассыыйаҕа экстремистскэйинэн ааҕыллан бобуллубута).

Ол курдук, Роскомнадзор быһаарбытынан, оонньуу иһигэр оҕолор сексуальнай дьайыылары көрсөллөрө үгүс — кинилэртэн интимнэй хаартыскалары көрдүүллэр, араас албынынан, куттааһынынан  күүһүлээһиҥҥэ угуйа сатыыллар.

«Roblox» диэн тугуй?

«Roblox» — бу көннөрү оонньуу буолбатах. Туһанааччылар бэйэлэрэ оонньуулары айар, оҥорор уонна тарҕатар виртуал эйгэтэ. Ол аата, ханнык баҕарар киһи дириҥ билиитэ суох да буоллар, бэйэтэ «разработчик» буолан, туспа «оонньуу иһигэр оонньуу» айан таһаарыан сөп. Платформа 2004 сыллаахха олохтоммута, оттон туһанааччыларга 2006 сылтан ыла киэҥник биллибитэ.

Дьокутааттар туох дииллэрий?

Госдуума дьокутаата Андрей Свинцов этэринэн, бобуу Арассыыйа сокуоннарын тутуһуннарар сыалтан ылыллыбыт быстах кэмнээх дьаһал буолуон сөп.

«Хаачахтааһын платформа бас билээччилэригэр сокуону тутуһалларыгар сабыдыаллыыр ньыма буолар. Кутталлаах контены бас билээччилэр бэйэлэрэ ыраастаан, оҕоҕо куттала суох эйгэни тэрийдэхтэринэ, бобуу уһуллуон сөп», — диир дьокутаат. Ону таһынан, кини төрөппүттэргэ оҕолорго атын, туһалаах дьарыгы булан биэрэргэ сүбэлээтэ. «Оҕону ханнык эрэ секцияҕа, куруһуокка биэрэр саамай бастыҥ быһаарыы буолар», — диэн Андрей Свинцов бэлиэтээтэ. #

Төрөппүттэргэ сүбэ

Бүгүҥҥү күҥҥэ оҕону интэриниэт кутталларыттан харыстыыр — хас биирдии төрөппүт ытык иэһэ. «Roblox» оонньуунан сибээстээн маннык сүбэлэри тутуһар наада:

1. Оҕоҕутун кытта аһаҕастык кэпсэтиҥ. Тоҕо бу оонньуу хааччахтаммытын, онно туох куттал баарын быһаарыҥ.
2.  «Roblox» оннугар оҕону атын сайыннарар, туһалаах дьарыктарга угуйуҥ. Холобур, остуол оонньуулара, кинигэ ааҕыыта, робототехника, саахымат, дуобат куруһуоктара, секциялар.
3.  Оҕоҕут төлөпүөнүн, көмпүүтэрин хайдах туһанарын кэтээн көрүҥ. Наада буоллаҕына, «төрөппүт хонтуруолун» туруоруҥ.