“Росмолодежь. Гранты” Арассыыйатааҕы куонкурус кыайыылаахтарын эҕэрдэлээтилэр

Бүгүн Дьокуускайга «Росмолодежь. Гранты” куонкурус кыайыылаахтарын бэлиэтээтилэр. Уопсай аахтахха, бырайыактарын олоххо киллэриигэ 8, 3 мөл. солк. көрүллүбүт.
Бастакы түһүмэххэ бүтүн дойду үрдүнэн 549 бырайыак киирбит. Кинилэртэн 32, 5 мөл. солк. уопсай суумаҕа 59 киһи ылбыт. Саха сирин чиэһин 98 кыттааччы көмүскээбит.
Бырайыагын туһунан “Береги” хайысха кыайыылааҕа, Мэҥэ Хаҥалас улууһуттан төрүттээх 14 саастаах Алексей Павлов кэпсээтэ. Кини бырайыагын сыалынан бэйэтин саастыылаахтарыгар төрөөбүт дойдуларын устуоруйатын остуол оонньуутун нөҥүө билиһиннэрии буолар. Оскуола үөрэнээччитэ 685 тыһ. солк. суумалаах граны кыайбыт.
Аартыкатааҕы култуура уонна ускуустуба институтун устудьуона Айталина Борисова “Вдохновляй” хайысхаҕа «Творческая площадка «ART-РЯД» бырайыагынан кыайбыт. Бырайыак Саха сирин арт-ырыынага эдэр худуоһунньугу кытта идэлээх ситимнэһиини хааччыйар мэлдьи баар платформаны оҥорууга сыалланар.
Айталина хамаандата балаҕан ыйыгар өрөспүүбүлүкэ художественнай тэрилтэлэрин кыттыылаах арт-дьаарбаҥканы тэрийэр былааннаах. Олоххо киллэриигэ 600 тыһ. солк. көрүллүбүт. “Объединяй” хайысхаҕа «Передвижная фотовыставка «Народы Якутии в лицах» бырайыагынан өрөспүүбүлүкэ ыччат ассамблеятын бэрэссэдээтэлин солбуйааччы Фаридун Хоматов кыайбыт. Бырайыак өрөспүүбүлүкэҕэ олорор норуоттары билиһиннэрэр. 200 тыһ. солк. граны ылбыт.

“Бүтэһик үс сылга Саха сирэ Уһук Илин эрэгийиэннэриттэн ыччат куонкурустарыгар сайаапка киирии ахсаанынан бастыҥнар кэккэлэригэр сылдьар. Куонкуруска элбэх дойдуга бэриниилээх буолууга сыһыаннаах бырайыактар кытыннылар. Ол курдук, сууттаммыт дьону чөллөрүгэр түһэрии уонна төрүт култуураны сайыннарыыга аналлаах курдук боччумнаах бырайыактары бэлиэтиэхпин баҕарабын. Улуус баһылыктара ыччат сүрүн хамсааһын уонна күүс буоларын өйдүүллэрэ көстөр. Өрөспүүбүлүкэ бырабыытылыстыбата эспиэртэр холбоһуктарын хаҥатарга үлэлиэҕэ”, — диэн бэлиэтээтэ өрөспүүбүлүкэ бырабыытылыстабытын бэрэссэдээтэлин солбуйааччы Ольга Балабкина. Кини куонкурус кыттыылаахтарыгар ыччат судаарыстыбаннай бэлиитикэтигэр кылааттарын иһин уонна актыыбынай гражданскай позицияларын иһин махтал суруктары туттарда.

«Өрөспүүбүлүкэ ыччата сылын ахсын “Росмолодежь. Гранты” куонкуруска федеральнай бюджет үбүлээһиннэн бырайыактарын олоххо киллэрэр. Ол эрээри, былаас бэрэстэбиитэлин кытта көрсүһүү бастакытын буолла. Маннык хабааннаах көрсүһүүлэр элбиэхтэрэ уонна биһиги ыччаппыт үлэтэ-хамнаһа салгыы да сыаналаныаҕа диэн эрэнэбин”, — диэн санаатын эттэ куонкурус эспиэрэ, “Харысхал” аһымал пуонда дириэктэрэ Любовь Клюкина.

Эльдар Садовников суруйуута.