Роспотребнадзор чикунгунья лихорадка туһунан быһаарда

Арассыыйаҕа чикунгунья лихорадка соччо куттала суох, тоҕо диэтэххэ, киһиттэн киһиэхэ буолбакка, бырдах нөҥүө бэриллэр, диэн Роспотребнадзор пресс-сулууспата иһитиннэрдэ.

Роспотребнадзор Арассыыйаҕа бу ыарыынан ыалдьыбыт дьахтар Москваҕа Сейшельскай арыылартан кэлбитин туһунан эттэ. Кини уоппускаҕа сылдьан бырдах ыстыырыттан  эминэн туһамматах.

“Инфекция дойду сиригэр-уотугар тэнийэр кыаҕа намыһах, тоҕо диэтэххэ, чикунгунья ыарыыны илдьэ сылдьар бырдах ыстаатаҕына сыстар”, — диэн пресс-сулууспа  суруналыыстарга быһаарбытын РИА-новости суруйар.

Чикунгунья вируһа (CHIKV) тогавирустар көрүҥнэригэр киирэр Alphavirus уустаах арбовирустарга киирсэр. Сүнньүнэн Африкаҕа, Азияҕа уонна Латинскай Америка дойдуларыгар үөскүүр Aedes ууһугар киирэр кумаардар ытырыыларыттан бэриллэр. Кэлиҥҥи кэмҥэ ыарыыны тарҕатар кумаардар Европа уонна АХШ дойдуларыгар эмиэ тарҕаннылар, онно бу ыарыы биирдиилээн түбэлтэлэрэ уонна олохтоох күөдьүйүүлэрэ бэлиэтэммиттэрэ.