Роспотребнадзор: Гонконг кириибин туһунан сымыйа сурах тарҕанна

Саха сиринээҕи Роспотребнадзор управлениета саайтыгар Гонконг кириибин туһунан социальнай ситимнэринэн тарҕанар иһитиннэриигэ быһаарыы таһаарда.

Өрөспүүбүлүкэҕэ ОРВИ-нан ыалдьыы дьыл кэмиттэн тутулуктаах үрдээһинэ бэлиэтэнэр, ортотунан нэдиэлэтээҕи эбиллии 17% тэҥнэһэр. Бу сыл 41-с нэдиэлэтиттэн саҕалаан кириип вирустара тарҕаналлара бэлиэтэнэр.

Нэдиэлэ аайы өрөспүүбүлүкэ мэдиссиинэ тэрилтэлэригэр кириипкэ уонна ОРВИ-га 10 тыһыынчаҕа диэри чинчийии ыытыллар. Кириип вируһун штаммын көрүҥүн «Вектор» ГНЦ ВБ ФБУН быһаарар уонна бигэргэтэр. Бу сыл 43-с нэдиэлэтигэр ылыллыбыт анаалыстар түмүктэрэ А(H3N2) кириип вируһа тарҕаммытын туоһулууллар, Гонконг кириибигэр сыһыаннааҕын туһунан быһаарыы суох.

Өрөспүүбүлүкэҕэ кирииби утары быһыы хампаанньата күүскэ салҕанар. Нэдиэлэ аайы быһыыны 40-тан 45 тыһыынчаҕа диэри киһи ылар. 433 быһыыны туруорар биригээдэ тэрилиннэ. Бүгүҥҥү күҥҥэ кирииби утары быһыы былаанын толоруу 74%-ҥа тэҥнэһэр.