Роспотребнадзор кутталлаах кириип кэлбитин туһунан сэрэттэ

Роспотребнадзор салайааччыта Анна Попова быйыл кутталлаах кириип тарҕана сылдьарын туһунан Арассыыйа олохтоохторун сэрэттэ. Кини доруобуйаҕа улахан охсууну оҥорор вирус барыйаана Арассыыйаҕа кэлбитин эттэ. Бу туһунан “Парламент хаһыата” суруйар.

Роспотребнадзор, өскөтүн 20 %-тан тахса оҕо ыалдьан кэлбэтэх түгэнигэр, кылааһы барытын тэйиччиттэн үөрэххэ ыытарга сүбэлиир суругу бэлэмнээбит. Бу 2009 сыллаахха бэрт түргэнник тарҕанар кириип быһыытынан биллибит, 2009-2010 сылларга дьаҥы (пандемия) көбүппүт А (H1N1) вирус буоларын федеральнай сулууспа бэлиэтиир. Бу барыйаан өлүүгэ даҕаны тиэрдэр түгэннэрэ баалларын ыйан туран, туругу улаханнык мөлтөтөрүн бэлиэтиир.

Онон, “таҥара сэрэҕи таптыыр” диэбиккэ дылы, эрдэттэн харыстанан маасканы кэтэ сылдьар ирдэнэр.