Роспотребнадзор: Ленскэйгэ «Север» ресто-бар 30 хонукка сабылынна

Ленскэй оройуонун борокуратуурата Роспотребнадзор олохтоох салаатын кытта бииргэ, интэриниэккэ кэһиилэр баар буолуохтарын сөбүн туһунан суруйуу тахсыбытын кэнниттэн, «Север» ресто-бары бэрэбиэркэлээтэ, диэн СӨ Борокуратууратын пресс-сулууспата суруйар.

Тэрээһин кэмигэр чааһынай урбаанньыт баһаартан сэрэхтээх буолуу ирдэбиллэрин тутуспата, ону таһынан санитарнай-эпидемиологическай нуормалары кэһэрэ быһаарылынна.

Роспотребнадзор исписэлиистэрэ дьону аһатыыны тэрийиигэ уонтан тахса санитарнай ирдэбил кэһиллибитин буллулар. Чинчийии түмүгүнэн оһоҕос палочкатын бөлөҕөр киирэр бактериялар бааллара билиннэ, бу сылдьааччылар доруобуйаларыгар кутталы үөскэтэр.

Булуллубут кэһиилэринэн сибээстээн борокуратуура РФ Административнай кодексатын 20.4 ыстатыйатын 1 чааһынан (баһаартан сэрэхтээх буолуу ирдэбиллэрин кэһии) уонна 6.6 ыстатыйатынан (санитарнай-эпидемиологическай ирдэбиллэри кэһии) административнай быраабы кэһии дьыалаларын көбүттэ.

Урбаанньыт аатыгар сэрэтэр сурук киллэрилиннэ. Матырыйааллары көрүү түмүгүнэн тэрилтэ бас билээччитэ административнай эппиэтинэскэ тардылынна. Суут санитарнай-эпидемиологическай ирдэбиллэри кэспитин иһин ыстараап анаата уонна ресто-бар үлэтин 30 хонукка тохтотто.

Оройуон борокуратуурата баһаартан сэрэхтээх буолуу нуормаларын уонна санитарнай быраабылалары тутуһуу уопсастыбаннай аһылык тэрилтэлэрин үлэтин булгуччулаах усулуобуйата буоларын уонна сылдьааччылар кутталлара суох буолуутуттан быһаччы тутулуктааҕын бэлиэтиир.