Роспотребнадзор Олоҥхо ыһыаҕар дьон сүһүрбүт төрүөтүн быһаарар

Нерюнгри оройуонугар ыытыллыбыт Олоҥхо ыһыаҕын кыттыылаахтара сүһүрэн балыыһаҕа киирбиттэрэ. От ыйын 9 күнүгэр 50-н тахса киһи балыыһаҕа көрдөрүммүтэ бэлиэтэнэр. Дьон маассабай сүһүрүүтүнэн Роспотребнадзор Саха сиринээҕи управлениета бэрэбиэркэ ыытар диэн ЯСИА иһитиннэрэр.

«От ыйын 9 күнүнээҕи туругунан Дьокуускай, Таатта, Нерюнгри, Мэҥэ Хаҥалас, Нам оройуоннарын балыыһаларыгар 50-н тахса киһи көрдөрүммүтэ биллэр. Эмсэҕэлээччи дьон куурусса этин сиэбиттэрин кытары сибээстииллэр. Билиҥҥи туругунан, управление исписэлиистэрэ мөлтөх хаачыстыбалаах бородууксуйаны эргииртэн устарга, бородууктанан хааччыйааччылары булууга, оҥорон таһаарааччылары кытта үлэлииллэр уонна лабораторнай анаалыстары ыытыыга, ону тэҥэ ыарыы тарҕаммыт сирдэригэр сэрэтэр үлэлэри ыыталлар», —  диэн биэдэмистибэҕэ этэллэр.

Нерюнгри оройуонун баһылыга Роман Щегельняк ЯСИА-ҕа эппитинэн, Олоҥхо ыһыаҕын кыттыылаахтарын аһылыгын тэрийэр уонна ас-үөл бородууксуйатын атыылыыр дьон бары тустаах санитарнай докумуоннаах этилэр. «Ону тэҥэ, тэрээһиннэр ыытыллар күннэригэр Роспотребнадзор үлэһиттэрэ икки чаас буола-буола бородууксуйаны бэрэбиэркэлээбиттэрэ», — диэн Щегельняк бэлиэтээтэ.

Биллибитинэн, тоҕус киһи, ол иһигэр биэһэ сонуннары тарҕатар сириэстибэлэр бэрэстэбиитэллэрэ уонна түөрт спортивнай судьуйа Таатта балыыһатыгар киирбиттэр. Кинилэр бары Нерюнгриттан Ытык Күөлгэ ыытыллар Манчаары оонньууларыгар үлэлии кэлбиттэр.

«Нерюнгри тэрээһиннэригэр үлэлээбит дьон бары, ол иһигэр оройуон бэрэстэбиитэллэрэ, волонтердар, спортивнай судьуйалар, быраабы араҥаччылыыр уорганнар үлэһиттэрэ, суруналыыстар уонна артыыстар, анал остолобуойга аһаабыттара. Бу олус элбэх киһи. Быраастар ыалдьыбыт дьон ханнык эрэ бородууксуйа буортуйбут баартыйатын сиэбит буолуохтарын сөп дииллэр. Сүһүрүү төрдө туохтан тахсыбытын туһунан сабаҕалааһын суох, тоҕо диэтэххэ, барыта үчүгэй курдук этэ. Ол гынан баран, үгүстэр ыалдьыбыттарын куурусса кэтилиэтин кытары ситимнииллэр. Ыарыы сибикитинэн мөлтөх турук, температура тахсыыта, сэниэтэ суох буолуу, ис тырыта тыытан ыалдьыыта, сүрэх өлөхсүйүүтэ буолаллар. Билигин даҕаны балыыһаҕа киирбит дьон туруга соччото суох. Эмтэниини толору ылабыт. Сабаҕалааһын быһыытынан, турукпутуттан көрөн, балыыһаҕа өссө да 7-14 күҥҥэ диэри сытыахтаахпыт», — диэн ЯСИА-ҕа Таатта балыыһатыгар сытар ыарыһах кэпсээтэ.