Роспотребнадзор: Олоҥхо ыһыаҕын менюта уларытыллыбыта билиннэ

Нерюнгри оройуонугар сальмонеллез ыарыыта бэлиэтэммит Олоҥхо ыһыаҕар кыттыылаахтары аһаппыт дьиҥнээх менюлара, эрдэттэн сөбүлэһиллибиттэн сөп түбэспэт эбит. Бу туһунан Роспотребнадзор эрэгийиэннээҕи управлениетын пресс-сулууспатыгар олоҕуран ТАСС иһитиннэрэр.

«Билиҥҥи туругунан  көмөҕө 50 киһи наадыйар, кинилэргэ туох баар көмө оҥоһуллар. Ыарыыны көбүтээччи — Salmonella. Бырааһынньык кыттыылаахтарыгар  аһылыгы ИП Жигунова Т.Б. уонна кини бэдээрээттиир тэрилтэлэрэ түөрт үөрэх кыһатын ас блоктарынан бэлэмнээбиттэр. Дьиҥнээх меню эрдэттэн сөбүлэһиллибиккэ сөп түбэспэтэ быһаарылынна», — диэн иһитиннэриигэ этиллэр.

Эмсэҕэлээбит дьон бары ыалдьыбыттарын тэрээһиҥҥэ бэлэм аһылыгы сиэбиттэрин кытта сибээстээҕэ чуолкайданар. Биэдэмистибэҕэ бэлиэтээбиттэринэн, аһы-үөлү оҥорооччуларга уонна тиэрдээччилэргэ сөптөөх миэрэлэр ылыллыахтара. Ону таһынан, исписэлиистэр алтыспыт дьону барыларын быһаарар үлэни ыыталлар, биоматериал боруобатын чинчийии салҕанар.