Роспотребнадзор: ОРВИ сезона саҕаланыан иннинэ сэрэтэр дьаһаллары ылыныҥ

Роспотребнадзор тымныйыы, ОРВИ, кириип уонна коронавирус саҥа сезона саҕаланыан иннинэ илиини чаастатык суунары, дистанцияны тутуһары, маасканы кэтэри уонна чэгиэн олоҕу тутуһары сүбэлиир диэн РИА Новости иһитиннэрдэ.

«ОРВИ саҥа эпидемическэй сезона саҕаланыан иннинэ Роспотребнадзор доруобуйаны харыстыыр сыалтан хас да сэрэтэр дьаһалы тутуһарга сүбэлиир. Илиигитин мыылалаан чаастатык суунун. Илии гигиената кириип, ОРВИ уонна коронавирус тарҕаныытын бохсорго тутаах дьаһалынан буолар. Илиини мыылалаан суунуу вирустары көдьүүстээхтик суох оҥорор. Илиигитин суунар кыаххыт суох буоллаҕына, антисептиктары туһаныҥ. Дьон тоҕуоруһар сирдэригэр сылдьан баран, эбэтэр тырааныспыранан айаннаан кэлэн, илиигитин эрэ буолбакка, сирэйгитин эмиэ булгуччу суунун», — диэн иһитиннэриигэ этиллэр.

Биэдэмистибэҕэ ыарыы бэлиэлэрдээх дьонтон миэтэрэ аҥаарыттан кырата суох ырааҕы тутуһар, ону тэҥэ сөтөллөргө эбэтэр ытырдарга айаҕы уонна муруну саба тутар наадалааҕын бэлиэтээтилэр. «Чэгиэн олоҕу тутуһуҥ. Чэгиэн олох эти-сиини инфекцияҕа утарсарын үрдэтэр. Күн эрэсиимин тутуһуҥ, толору утуйуҥ, белогунан, битэмиининэн уонна минералынан баай аһы-үөлү аһааҥ, эти-хааны эрчийиҥ. Мааскалары туһаныҥ. Мааскалар вирус тарҕаныытын хааччахтыыллар», — диэн эттилэр.

Роспотребнадзор дьон мустар сирдэригэр уонна ыарыһах дьону кытта кэпсэтэргэ  мааскалары кэтэргэ сүбэлиир. Мааска сирэйгэ ыга сыстыахтаах, айаҕы уонна муруну сабыахтаах, ону таһынан икки чаас аайы уларытыллыахтаах. Ону тэҥэ маасканы устуох иннинэ илиини суунар эбэтэр антисептигынан сотор, маасканы тыыппат буола сатыыр, биир маасканы хос туттубат уонна туттан баран тута быраҕар ордук диэн сүбэлииллэр.