Роспотребнадзор: сыстыганнаах ыарыы түбэлтэтэ регистрацияламмата

СӨ Роспотребнадзор управлениетын суһал бөлөҕө Нам улууһугар үлэлиир.

Саха сирин доруобуйа харыстабылын үлэһиттэрэ А вируснай гепатиттан уонна дизентерияттан утары быһыы туруоруу үлэтин ыыталлар.

Роспотребнадзор пресс-сулууспата иһитиннэрбиттэринэн, ууга барбыт нэһилиэнньэлээх пууннар олохтоохторун ортолоругар сыстыганнаах ыарыылар уонна маассабайдык аһылыктан сүһүрбүт түбэлтэлэрэ регистрацияламматах. Инфекционнай ыарыыны кэтээн көрүү үлэтэ күүһүрдүлүннэ.

Роспотребнадзор быстах кэмҥэ олорор дьону-сэргэни санитарнай-эпидемиологическай өттүнэн ыраас уу, ас-үөл хаачыстыбатын хонтуруоллуур.

«Быстах кэмҥэ дьону олордор пууннар барыта бэрэбиэркэлэннилэр. Санитарнай- химическэй, микробиологическай, вирусологическай чинчийиилэр ыытылыннылар. Гигиена уонна эпидемиология киинин лабораторията суукканы эргиччи эрэсиимнээх үлэлиир. Булуллубут бэлиэтээһиннэри туоратар дьаһаллар, этиилэр киллэрилиннилэр», — диэн биэдэмистибэ иһитиннэрэр.

Ууттан босхоломмут сирдэргэ уонна дьиэлэргэ дезинфекция үлэлэрэ ыытыллаллар. Ол курдук, 125 олорор дьиэ дезинфекцияланна. Дезинфекционнай үлэни ыытарга өйдөтүү дьаһаллар, оройуоннарга дезинфекционнай биригээдэлэр инструктажтара буоллулар.