Роспотребнадзор: Тэллэйтэн сүһүрүүттэн хайдах харыстаныахха сөбүй?

Тэллэй хомуйуута үгэннээн турар кэмигэр, Роспотребнадзор управлениета олохтоохтору сүһүрүүттэн сэрэтэр туһуттан тэллэйи хомуйууга, атыылаһыыга уонна астыырга-бэлэмнииргэ ураты сэрэхтээх буоларга ыҥырар.

Тэллэйтэн сүһүрүү үксүгэр тэллэй көрүҥнэрин ситэ билбэттэн тахсар. Дьон билбэт эбэтэр сүлүһүннээх тэллэйдэрин экологическай өттүнэн мөлтөх туруктаах сирдэртэн, холобур, суол таһыттан, куорат пааркаларыттан хомуйаллар. Оннук сирдэргэ тэллэй буортулаах эттиктэри иҥэринэр. Сиэниллэр тэллэйдэр кураан кэмҥэ эбэтэр сири үөнтэн-көйүүртэн утары пестицидтэринэн эбэтэр дьааттаах химикаттарынан ыстардахтарына сүлүһүннээх буолуохтарын сөп. Ону таһынан, тэллэйи үөн сиэтэҕинэ уонна саҥа хомуллубут эбэтэр буспут тэллэйи сыыһа харайдахха сүһүрүөххэ сөп.

Тэллэйи хомуйууга уонна астыырга-бэлэмнииргэ сүбэлэр:

• — Тэллэйи суоллартан уонна нэһилиэнньэлээх пууннартан тэйиччи хомуйуҥ;
• — Бэйэҕит үчүгэйдик билэр тэллэйдэргитин эрэ хомуйуҥ уонна хомуйбут күҥҥүтүгэр астааҥ-бэлэмнээҥ;
• — Тэллэйдэри көрүҥнэринэн наардааҥ уонна хас биирдии көрүҥүнэн туспа астааҥ;
• — Сорох сиэниллэр тэллэйдэри, холобур, үрүҥ тэллэйи, үөрэ тэллэйи уонна аппа тэллэйи эрдэттэн оргуппакка эрэ астыахха сөп;
• — Тэллэйи маринуйдуурга эбэтэр тууһуурга сыыҥка эбэтэр иһэ-таһа глазурдаммыт туой иһити туттумаҥ;
• — Тэллэй  түргэнник буортуйар ас, онон сылаас сиргэ харайымаҥ;
• — Тэллэйи атыылаһарга, атыы-эргиэн быраабылаларын тутуһуллалларыгар болҕомтото ууруҥ. Тэллэй анал сирдэргэ эбэтэр стационарнай маҕаһыыннарга эрэ атыыланыахтаах.
• — Көҥүлэ суох атыы-эргиэн тэриллибит сирдэригэр уонна чааһынай дьонтон тэллэйи атыылаһымаҥ;
• — Дьиэҕэ оҥоһуллубут кэнсирэбэлэммит тэллэйи атыылаһар сүбэлэммэт.

Ботулизм – бактериялар токсиннарыттан үөскүүр, ниэрбинэй систиэмэни сүһүрдэр кутталлаах ыарыы. Сүһүрүү үксүн дьиэҕэ оҥоһуллубут кэнсиэрбэлэртэн, ордук тэллэйтэн, оҕуруот аһыттан, балыктан уонна эттэн тахсар. Дьиэҕэ оҥоһуллубут кэнсиэрбэни сиэн баран, туруккут мөлтөөтөҕүнэ, тутатына бырааска көрдөрүнүҥ уонна кэнсиэрбэлэммит аһы сиэбиккит туһунан хайаан да этиҥ. Кэнсиэрбэлэммит аһылык бааҥкатын быраҕымаҥ –  лабораторияҕа чинчийиигэ ыытыахха наада. Бу сүһүрүү төрүөтүн түргэнник быһаарарга, диагноз туруорарга уонна сөптөөх эмтэниини саҕалыырга көмөлөһүө.