«Росприроднадзор» Саха сиригэр атомнай ыстаансыйаны тутууну биһирээтэ

«Росприроднадзор» Саха сиригэр кыра кыамталаах атомнай ыстаансыйа тутуутун биһирээтэ.

Бу иннинэ матырыйааллары Уус Куйга бөһүөлэгэр уопсастыбаннай истиилэргэ биһирээбиттэрэ. Манна кыра кыамталаах атомнай ыстаансыйа тутуута былааннанар диэн «Росатом» хампаанньа иһитиннэрэр.

Саха сиригэр атомнай ыстаансыйа РИТМ- 200Н рекаторнай установка баазатыгар 55 МВт кыамталаах «Росатом» хампаанньа сүрүн бырайыактарыттан биирдэстэрэ буолар. Билигин Уус Куйга бөһүөлэгэр кыра кыамталаах атомнай ыстаансыйа тас инфраструктуратын эбийиэктэрин уонна быстах кэмҥэ 1500 тутааччы  олорор куоратын туталлар. Ону кытта Уус Куйга бөһүөлэгиттэн тутуу уонна тиэхиниичэскэй бааза былаһааккатыгар диэри айан суола оҥоһуллар.

Саҥа ыстаансыйа дойдуга биир саамай бөдөҥ минеральнай-сырьевой киининэн буолуоҕа. Инникитин бырамыысланнай тэрилтэлэри ититиинэн уонна электроэнергиянан хааччыйыаҕа. Итинэн сибээстээн, Кучус, Депутатскай, Тирэхтээх курдук сир баайын хостуур баазалара, суоллара уонна инженернэй инфраструктуралара сайдыаҕа, Усуйаанаҕа уонна Үөһээ Дьааҥыга саҥа социальнай эбийиэктэр эбиллиэхтэрэ, «Уус Куйга — Тирэхтээх — Депутатскай» 110 (220) кВ кыамтаах уот лииньийэтин тутуллуута саҕаланыаҕа.

Санаттахха, Саха сиригэр кыра кыамталаах атомнай ыстаансыйаны 2028 сылга үлэҕэ киллэрэллэрэ былааннанар.