“Россельхозцентр” филиала былаанын толорбут

СӨ Тыатын хаһаайыстыбатын уонна аска-үөлгэ бэлиитикэтин министиэристибэтэ ыыппыт агрономнар сүбэ мунньахтарыгар   “Россельхозцентр” ФГБТ Саха сиринээҕи филиалын ааспыт сыллааҕы үлэтин туһунан  бу тэрилтэ салайааччытын солбуйааччы Мария Дуранова иһитиннэрии оҥорбута.

Тустаах тэрилтэ ааспыт сыллааҕы ылыммыт былаанын толорбут.  Филиал сиэмэ хаачыстыбатын хонтуруоллуур отделын исписэлиистэрэ ааспыт сылга 2573 сиэмэ боруобатын анаалыстаабыттар. 2024 сылга уопсайа 1645 туонна сиэмэ сэртипикээттэммит. 59 сэртипикээт бэриллибит.

Сиэмэнэн дьарыктанар хаһаайыстыбаларга сэртипикээт биэрэр үлэ салҕанар. Бүгүҥҥү туругунан РФ Сиэмэнэн дьарыктанар хаһаайыстыбаларын реестригэр 12 тыа хаһаайыстыбатын тэрилтэтэ баар. Кинилэртэн 4 хаһаайыстыба 2025 сыл кулун тутар ыйыгар диэри хаттаан сэртипикээссийэни ааһыахтаахтар (“Биэттэ-Агро” ХЭТ, “Илларионов” бааһынай хаһаайыстыбата, “Тумул” ТХПК, “Наука” ХЭТ). Филиал үлэтэ “АгроСемЭксперт” уонна “Цифровой мониторинг” бырагыраамаларга киллэриллэр.

2024 сыл балаҕан ыйын 1 күнүттэн “Семеноводство” ФГИС бырагыраамата үлэтин саҕалаабыт. Онон киирэ илик хаһаайыстыбалар бу ситимҥэ киириэхтээхтэрэ ирдэнэр.

Хаартыска: М.Дуранова ыытта