Саха сиригэр ынах арыытын эргиэнтэн уһулбуттарын туһунан СИА бүгүн иһитиннэрдэ. Ол курдук, “бассыыбай” арыы атыыланан, дьон доруобуйатыгар охсуулаах буолуоҕун, хата, Россельхознадзор управлениетын “ВетИС” диэн федеральнай систиэмэтин искусственнай интеллектээх бырагыраамата тохтоппут.
Бу төһө кырдьыгын туһунан билээри Россельхознадзор Саха сиринээҕи управлениетын пресс-сулууспатыттан туоһуластыбыт.
— Үүт туттарааччылар “Меркурий” диэн систиэмэни бэркэ билэллэр. Ол бырагыраама барытын көрдөрөр буоллаҕа дии. Тустаах бырагыраама “ВетИс” диэн ырытар систиэмэлээх. Ол көрдөрбүтэ. Бастаан арыы оҥоһуллубут үүтүн кээмэйэ кырата уорбаламмыта. Ол 11 туоннаттан хайдах даҕаны 95 туонна арыыны оҥорон таһаарбат буоллаҕыҥ дии. Онон хамсааһын тахсан, бэрэбиэркэ ыытыллан, кэлбит ынах арыытын эргиэнтэн уһулбуттара, — диэтэ тэрилтэ пресс-сулууспатын салайааччыта Петр Неймохов.
Чуолаан, бэтэринээринэй-арыаллыыр докумуону ырытыы түмүгэр Татарстантан хааччахтаммыт эппиэтинэстээх тэрилтэ 95 туонна кээмэйдээх арыыны Дьокуускайга тиэрдибитэ чуолкайдаммыт. Арыыны Татарстан биир кэмбинээтэ оҥорбут, киирбит сырье анаалыһа бу арыыны оҥорорго 11 туонна чөчөгөй Москва уобалаһыттан киирбитин, оттон онно Свердловскай уобалаһыттан тиэрдиллибитэ быһаарыллыбыт. Дьэ, арыы оҥоһулларын туһугар сүрдээх айан диэтэҕиҥ.
Бэлэм бородууксуйа унньуктаах айанын кэтээн көрөн, Россельхознадзор уонна Амур уобалаһынааҕы управлениелара хантан ылыллыбыта биллибэт сырьенан таптайыллыбыт 95 туонна ынах арыытын Саха сиринээҕи тэрилтэ ылбытын чопчулаабыттар.
Онон сэтинньигэ бу бородууксуйаны туһаныыттан (эргиэнтэн) уһуларга тустаах аадырыһыгар сурук ыытыллыбыт. Сэтинньи бастакы декадатын бүтүүтэ тэрилтэ бородууксуйаны киин ыскылааттан ылан, тупса харайбыта уонна ол туһунан кэтээн көрөр уоргаҥҥа биллэрбитэ. Сэтинньи бүтүүтэ тэрилтэ 19 туонна арыыны ылбыт тэрилтэтигэр төнүннэрбитэ. Хаалбыт арыыны ахсынньы бүтүүтэ-тохсунньу саҕаланыыта Өлүөнэнэн туорааһын улахан уйуктаах массыыналарга толору аһылыннаҕына ыытыахтара. Ону тэҥэ Россельхознадзор Татарстаннааҕы управлениетыгар бу чахчы туһунан биллэриллибит.
Онон ынахпыт да арыыта араастаах буолбут. Хата, өйдөөх тэрил абыраабыт. Олохтоох арыыбытын – Чурапчы, Сыа Бүлүү, Таатта, Амма уонна да атыттар киэннэрин сиир быдан ордук буолууһу.
Хаартыска: СИА
Өрөспүүбүлүкэ киинигэр сэтинньи 8-9 күннэригэр күрэхтэһэр пилота суох көтөр аппарааттарга Саха сирин Куубага ыытыллара былааннанар.…
Норуот сомоҕолоһуутун күнүнэн, Саха сирин национальнай аһын-үөлүн «сүрэҕэр» – «Тыгын Дархан» эрэстэрээҥҥэ дойду нэһилиэстибэтигэр анаммыт…
Саха сиригэр бу сыл тоҕус ыйын түмүгүнэн дьиэ кэргэҥҥэ сыһыаннаах бэлиэтэммит буруйу оҥоруулар ахсаана 8,6%-нан…
Байыаннай дьайыы кэмигэр Арассыыйа байыаннайдара былдьаабыт трофейнай байыаннай тиэхиньикэлэрин быыстапката Дьокуускай куорат «Арассыыйа – мин…
Саха сирин үгүс улуустарыгар бу күннэргэ муҥха бөҕө тэрилиннэ. Онон сир-дойду аайы хайа күөлгэ муҥхалыылларын…
Алдаҥҥа «Селигдар Куубага» диэн хайыһарынан сүүрүүгэ Бүтүн Арассыыйатааҕы күрэхтэһиилэр буолан аастылар. Алтынньы 31 күнэ түмүктүүр…