«Россия 360» суперэкспедиция уон ый устата дойду бары кыраныыссатынан айаннаан, Мурманскайга тиийдэ

Дойду биир уһун айан суолунан массыынанан экспедицията – «Россия 360» түмүктэннэ. Сылы кыайбат кэм иһигэр, биллэр-көстөр айанньыт, чинчийээччи Богдан Булычев салайааччылаах хамаанда Арассыыйа бары сирдээҕи кыраныыссаларын устун айаннаата диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

Арассыыйа бэрэсидьиэнэ Владимир Путин сөбүлэһиитинэн, РФ Бырабыыталыстыбатын бэрэссэдээтэлин солбуйааччыта – РФ бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев, РФ Уһук Илин уонна Арктика сайдыытыгар миниистир Алексей Чекунков, Бэрэсидьиэн гранын пуондатын өйөбүллэринэн быйыл тохсунньу ый бүтүүтэ Мурманскайтан континентальнай экспедиция саҕаламмыта уонна сэтинньи 23 күнүгэр Арассыыйа кыраныыссаларын устун толору эргиири оҥорон, эргиллэн кэллэ.

Элбэх айанньыт маннык уустук суоллары туоруу сатаабыта. Ол эрээри олор бары табыллыбатахтара. Ону «Россия 360» экспедиция бастакы сорунуутуттан ситистэ. Быйылгы навигация кэмигэр Хотугу муора суолун кытыытынан аан бастаан массыынанан айаннаатылар. Бырайыак партнердара «Росатом» судаарыстыбаннай корпорация уонна «Атомфлот» ФГУП өйөбүллэринэн, экспедиция чилиэннэрэ Хотугу полюска сылдьан, Томскайга оҥоһуллубут «Рысь» квадроциклы бэрэбиэркэлээтилэр.

«Айаннааһын – бу, бастатан туран, уопут, планета саамай кэрэ муннуктарын илэ хараххынан көрүү, араас эрэгийиэннэргэ сылдьан дьон хайдах олорорун билии, оттон спортивнай туризм буоллаҕына, күүскүн-уоххун бэрэбиэркэлээһин, ханнык баҕарар усулуобуйаҕа үөрэнии, кытаанах санааны бөҕөргөтүү. Эдэр дьон айанныахтарын, саҥаны билиэхтэрин, бэйэлэрин иннигэр элбэҕи арыйан иһиэхтэрин наада. Хорсун уонна дьулуурдаах хамаанда Хотугу муора суолунан Мурманскайтан Чукоткаҕа диэри Арктиканы барытын кэрийдэ. Баренцев муора уонна Тиихэй акыйаан кытылын устун Камчаткаҕа тиийдилэр. Курильскай арыыларга уонна Сахъалиҥҥа сырыттылар. Владивостоктан Сибииринэн, Уралынан Кавкааһынан, Крымҥа диэри айаннаан саҥа эрэгийиэннэригэр сылдьан баран, дойдубут саамай арҕаа туочукатыгар – Калининградка тиийдилэр. Маршрут Мурманскайга түмүктэннэ. Экспедицияны сыл кэриҥэ дойдубут бары олохтоохторо кэтээн көрдүлэр. Хамаанда бэйэтин холобурунан дьон интэриэһин тарта, айанныырга көҕү уонна хорсун санаа диэн тугун көрдөрдө. Мин эрэнэбин, эдэр, хорсун хамаанда иннигэр улахан ситиһиилэр күүтэллэр диэн эрэллээхпин», — диэн Юрий Трутнев тыл эттэ.

Экспедиция дойду иһигэр оҥоһуллар массыыналарынан айаннаабыта – «Бурлак» вездеходтан саҕалаан 1975 сыллаахха оҥоһуллубут былыргы «Москвич-426» тиийэ. Тиэхиньикэлэргэ дойдуга оҥоһуллубут  Ikon Tyres шиналара олордуллубуттара. Хамаанда экипировката эмиэ бэйэбит «БАСК» фирмабытынан хааччыллыбыта.

Экспедиция «Арассыыйа рекордарын кинигэтигэр» киирбит түөрт аан дойду рекордун олохтоото. Рекорду бигэргэтэр сэртипикээт – «Хотугу муора суолун кытылынан биир түһүмэҕинэн сир устун көлүөһэлээх тиэхиньикэнэн аан дойдуга бастакынан айаннааһын» – финиш линиятыгар кэлээттэрин туттарылынна. Оттон атын рекордтар бэрэбиэркэни ааһаллар уонна эмиэ рекортар кинигэлэригэр киириэхтэрэ.

Сиһилии манна ааҕыҥ.