Розалия Тихонова: «Сойбот сонуннаах «Саха сирэ» хаһыаты дьиэ кэргэнинэн ааҕыахха!» (видео)
![](https://sakha-sire.ru/wp-content/uploads/2023/11/64ee24dd-c59d-4afa-bfb1-da41861de4d0-1-1024x596.jpeg)
Розалия Михайловна Тихонова – дьахталлартан бастакы уонна соҕотох Аар Дархан этээччи, СӨ култууратын туйгуна, Ньурба улууһун култуураҕа департаменын начаалынньыга, Ньурба куорат Бочуоттаах олохтооҕо. Кини «Саха сирэ» өрөспүүбүлүкэтээҕи хаһыаты ааҕарга ыҥырар:
![](https://sakha-sire.ru/wp-content/uploads/2023/11/48a99ea4-60f7-4006-8d02-84df5d310087.jpeg)
— Сахам дьоно, үрүҥ үрүмэ тыллары үрүлүччү үөрдүтэр, сойбот сонуннаах, кэрэ кэпсээннээх «Саха сирэ» хаһыаты бүттүүн дьиэ кэргэнинэн ааҕыахха, саргылаах саха саҥатын сайыннарыахха!
Розалия Михайловна төрөөбүт Ньурбатын улууһугар култуура эйгэтигэр, онтон социальнай эйгэҕэ сүүрбэччэ сыл үлэлээбитэ. Психологическай киини, тулаайах оҕолорго приюту тэрийэн, доруобуйаларыгар хааччахтаах оҕолору реабилитациялыыр киин саҥа дьиэтин туттаран, өрөспүүбүлүкэтээҕи таһымҥа таһааран баран, култууратыгар төннүбүтэ.
— Социальнай эйгэҕэ үлэлээн, арааһа, ытык иэспин төлөөтүм быһыылаах. Оҕо сылдьан эмтэнэн, киһи-хара буолбут иэстээх сырыттаҕым, — диэн кини этэр.
Төрөөбүт дойдутун сайыннарыыга туһаайан, салайан-тэрийэн, өбүгэ оонньуутун — оһуохайы тарҕатан, үйэтитэн, үлүһүйэ үлэлии-хамсыы сылдьар кэрэ киһилиин кэпсэтиини «Саха сирэ» хаһыат сэтинньи 9 күнүнээҕи нүөмэригэр ааҕаарыҥ.
Аар Дархан этээччи күндү куолаһын көбүөхтэтэн, көмүс кылыһаҕын лыҥкынатан, анал алгыс тойугун туойбутун видеоҕа көрүҥ, истиҥ, сэҥээриҥ.
Сообщить об опечатке
Текст, который будет отправлен нашим редакторам: