Руслан Босиков: «Ил Дархан 2024 с. дьадайыыны утары ылыммыт, дьиэ кэргэни өйүүр этиитин биһирии иһиттим»

Бүгүн Саха Өрөспүүбүлүкэтин Баһылыга Айсен Николаев Ил Түмэҥҥэ уонна Бырабыыталыстыбаҕа туһаайан эппит Анал этиитигэр «СӨ баһаары утары судаарыстыбаннай сулууспата» ГБУ начаалынньыга Руслан Босиков санаатын үллэстэр:

— Саха Өрөспүүбүлүкэтин баһылыга Айсен Николаев Анал этиитин, биһиги, баһаартан сэрэхтээх буолуу судаарыстыбаннай сулууспа үлэһиттэрэ уонна кинилэр дьиэ кэргэннэрэ сыл аайы күүтэбит. Ил Дархан 2024 с. дьадайыыны утары ылыммыт, дьиэ кэргэни өйүүр, социальнай хантараак икки төгүл үрдээн 500 тыһыынча солкуобай буолуо диэн этиитин биһирии иһиттим. Кэлэр сыл тохсунньу 1 күнүттэн «Дьиэ кэргэн» өрөспүүбүлүкэтээҕи ийэ хапытаала икки төгүл улаатан 300 тыһыынча солкуобайга диэри үрдүөҕэ.

Биһиги сулууспабытыгар элбэх оҕолоох дьиэ кэргэн аҕа баһылыктара үлэлииллэр. Мин бэйэм оскуолаҕа үөрэнэр саастаах элбэх оҕолоох төрөппүт буоларым быһыытынан, дьиэ кэргэн оҕону иитиигэ уонна уопсастыбаҕа оруолун түстүүрүн өйдүүбүн. Ийэ сылыгар киирбит «100 сыл оҕолоро» тус сыаллаах хапытаал биэс сылга уһатылынна. 2024 сылга ол кээмэйэ индексациянан 110-тан тахса буолуоҕа.

Оттон хаарбах дьиэттэн көһөрүү боппуруостара ыарахан содуллаах баһаардар тахсалларын кыччатыа уонна дьон сиэртибэтэ суох буолуутун кэрэһилиэ этэ.
Биһиги кэллэктииппит байыаннай дьайыы саҕаланыаҕыттан биир дойдулаахтарбытыгар – байыаннай сулууспалаахтарга уонна мобилизацияҕа ыҥырыллыбыт биһиги бииргэ үлэлиир табаарыстарыбытыгар-байыастарбытыгар көмө оҥорор. Хас биирдии подразделениебыт анал байыаннай дьайыыга кытта сылдьар – уоту кытары охсуһааччы биир идэлээхтэрбит дьиэ кэргэттэригэр сыһыарыллан көмөлөһөр. Сыл устата бу дьиэ кэргэттэргэ наадалаах бородууктаны атыылаһыыга уонна араас даҕаны кыһалҕалаах боппуруостары быһаарарга көмөлөһөр.