Руслан Егоров: «Эдьигээҥҥэ таба ахсаанын элбэтэргэ дьулуһабыт»

Табаһыттар IV  сийиэстэригэр өрөспүүбүлүкэ хоту улуустарыттан барытыттан кыттыыны ыллылар.

Сэттэ сыл устата тохтуу сылдьыбыт табаһыттар суолталаах тэрээһиннэригэр Эдьигээн улууһун дэлэгээссийэтэ эмиэ кыттыыны ылла. Бу туһунан Эдьигээннээҕи тыа хаһаайыстыбатын управлениетын кылаабынай исписэлииһэ Руслан Егоров кэпсээтэ:

— Улууспутуттан 12 дэлэгээт кыттыыны ылла, онтон 8-һа табаһыт. Сиринэн «Урал» массыынанан 12 табаны аҕалбыппыт. Көлүүр табаларынан биир хамаанданан кыттыыны ыллыбыт. Көһө сылдьар олохтоох  дьиэ кэргэн суох. Онон бу хайысхаҕа кыттыбатыбыт. Улууспутугар икки ыстаадалаахпыт. Кэлиҥҥи икки сылга таба ахсаанын элбэтэргэ дьулуһабыт.  Ортотунан 787 төбө табаттан билигин 882 төбө табалаахпыт. Ыстаадаларбытыгар  35 диэри удьуор табаһыт ыччат  үлэлиир.   Сүрүн көлөбүт — таба. Чуум үлэһит дьахтар суох. Эр дьон бэйэлэрэ «чуумнууллар».

Онон сорох хоту улуустарга дьахтар-аймах, син ыччат кэриэтэ, ыстаадаҕа таласпат эбит. Бу эмиэ аныгы олох көстүүтэ.