Руслан Федотов: «Дьоммут-сэргэбит өйөбүлүнэн, түмсүүбүтүнэн туруоруллубут сыалы-соругу ситиһиэхпит!»

Руслан Еремеевич Федотов, Ил Түмэн дьокутаата:

— Ил Дархан бүгүҥҥү Анал этиитэ Саха сирин сайдыытын түстүүр этии буолуоҕа. Быйыл Саха АССР төрүттэммитэ 100 cылын бэлиэтээтибит. Ол чэрчитинэн элбэх араас тэрээһиннэр буоллулар. Ааспыт нэдиэлэҕэ Москваҕа, Санкт-Петербурга Саха сирин күннэрэ, Федерация Сэбиэтигэр дьоһун көрсүһүү бэрт таһаарыылаахтык буолан ааспыта. Онон бэрт сотору өрөспүүбүлүкэбит сайдыытыгар төһүү буолар уураах тахсарын эрэнэ күүтэбит.

Кэнники сылларга аан дойду үрдүнэн бүрүүкээбит сыһыан, сааҥсыйа, дойдубут көмүскэллээх буолуутугар экэниэмикэбит хас биирдии салаатыгар эрэллээх инфраструктура, бэйэ оҥорон таһаарар бородууксуйата наадатын, ону таһынан оҕо, ыччат дойдутугар бэриниилээх, туһалаах, үлэҕэ-олоххо бэлэм буола улаатарыгар сүдү болҕомто ууруллуохтааҕын өссө төгүл бигэргэттэ. Саха сирин курдук тыйыс айылҕалаах сиргэ тыа хаһаайыстыбатын уонна уопсайынан даҕаны экэниэмикэҕэ сыһыаннаах үлэни-хамнаһы тэрийэр, сайыннарар олус ыараханын биһиги бары өйдүүбүт. Ол иһин судаарыстыба тыа сирин олохтоохторугар көмөлөһөр эбээһинэстээх уонна көмөлөһүө даҕаны. Тыа сирин олохтоохторо – биһиги тирэхпит, онон тыа хаһаайыстыбатынан дьарыктанар дьоммутун өйүөх тустаахпыт. Биһиги, Саха сирин олохтоохторо, Арассыыйа олохтоохторо бары даҕаны тастан кэлэр бородууксуйаттан олохтоох аһы-үөлү ордоробут. Биһиги аграрийдарбыт элбэх бородууктаны оҥорон таһааран элбэх дохуоту аахсыахтаахтар. Тыа хаһаайыстыбатынан дьарыктанар дьону өйүүр саҥа ньыма тыа сирин нэһилиэнньэтин олоҕун уйгутун дьиҥнээхтик тупсарыахтаах. Быйыл тыа хаһаайыстыбатын бүддьүөтүн Ил Түмэҥҥэ көрүүгэ Ил Дархан «Эбии 2.5 миллиард солкуобай үбү эбиэххэ», — диэн этии киллэрэн 2023 сылга бүддьүөттэн тыа хаһаайыстыбатыгар 14 миллиард 200 мөлүйүөн солкуобай көрүлүннэ. Онон хаһан даҕаны буолбатах улахан суумма тыа хаһаайыстыбатыгар тыырылынна. Билиҥҥи уустук кэмҥэ улахан ситиһии буолар. Тыа хаһаайыстыбата сайдарыгар саҥа эбийиэктэр, оҥорон таһаарыы собуоттара наадалар. «Бу көрүллүбүт үбүлээһин көдьүүстээх уонна таһаарыылаах буоларын ирдиэхтээхпит. Үп-харчы тыаҕа үлэлии олорор дьоҥҥо быһа тиийиэхтээх, олох тупсарыгар көмө буолуохтаах, дьокутааттар ону хонтуруоллуугут”, — диэн соруйда. Төрөөбүт-үөскээбит сирбит сайдыытыгар ууруллар сүдү соруктар, тулхадыйбат сыал-сорук туолуута, олоххо киириитэ хас биирдиибит интэриэспит буолар. Дьоммут-сэргэбит өйөбүлүнэн уонна түмсүүбүтүнэн туруоруллубут сыалы-соругу ситиһиэхпит!