Русскай Устьеҕа электростанция умайбыт

Оптуорунньукка, кулун тутар 4 күнүгэр, Аллайыаха оройуонун Русскай Устье сэлиэнньэтигэр электростанцияҕа баһаар турбутун туһунан биллэрбиттэр.

Бу туһунан Саха сиринээҕи Быыһыыр сулууспатаын пресс-сулууспата иһитиннэрэр. Биэдэмистибэ иһитиннэриитинэн, баһаар «Сахаэнерго» ДЭС дьиэтигэр тахсыбыт. Тыа сиригэр кылгас болдьоххо электроэнергиянан хааччыйыыны аварийнайдык араардылар. 10 №-дээх хочуолунай резервнэй источникка көһөрүлүннэ. Ититиинэн хааччыйыыга хааччах суох. Салгын температурата -29 кыраадыс тымныы.

ОДьКХ министиэристибэтэ иһитиннэрбитинэн, баһаар умуруоруллубут, эмсэҕээлээбит дьон суох. СӨ ОДьКХ уонна энергетикаҕа миниистирэ Вячеслав Емельянов электроэнергиянан хааччыйыы ыстаабын суһал мунньаҕын ыытта. Саахал содулларын туоратыыга сөптөөх быһаарыылар ылылыннылар. Тахсыбыт саахал министиэристибэ хонтуруолугар сылдьар. Ону сэргэ технологическай кэһиилэр тахсыбыттарын чинчийэр анал хамыыһыйа тэрилиннэ.