Рустам Каженкин – “Төрөөбүт тыл уонна литэрэтиирэ бастыҥ учуутала-2025” өрөспүүбүлүкэтээҕи күрэс муҥутуур кыайыылааҕа

Дьокуускай куорат “Айыы Кыһата” национальнай гимназия саха тылын уонна литэрэтиирэтин учуутала Рустам Каженкин “Төрөөбүт тыл уонна литэрэтиирэ бастыҥ учуутала-2025” идэ маастарыстыбатын Бүтүн Арассыыйатааҕы күрэһин эрэгийиэннээҕи түһүмэҕэр муҥутуур кыайыылааҕынан таҕыста. Кини быйыл Улан-Удэ куоракка буолар Бүтүн Арассыыйатааҕы күрэскэ Саха сирин аатыттан кыттыаҕа.

Рустам Николаевич – 18 сыл ыстаастаах учуутал. “Идэбин ыраах Дьааҥы улууһун Адыаччы сэлиэнньэтигэр биһиэхэ төрөөбүт литэрэтиирэҕэ сэҥээриини үөскэппит, төрөөбүт тылга билиини, тапталы таһынан, биһиги киһи быһыытынан улаатан тахсарбытыгар улахан оруоллаах учууталым, СӨ үөрэҕин туйгуна, Учууталлар учууталлара Вера Семеновна Слепцова сүбэтинэн талбытым. Бүгүн мин бу ураты сорудаҕы сүгэбин, глобализация үйэтигэр биир идэлээхтэрбин кытта тылбытын, норуот култууратын чөл хаалларар туһугар үлэлэһэбит, үүнэр көлүөнэҕэ төрөөбүт тыл, литэрэтиирэ нөҥүө норуот ураты өйүн-санаатын, күүһүн тириэрдэбит” –диэн күрэс кыайыылааҕа этэр.

Быйыл идэ маастарыстыбатын өрөспүүбүлүкэтээҕи күрэһигэр Саха сирин араас улуустарыттан 17 учуутал кыттынна. Күрэс С.Н.Донской II аатынан Үөрэҕи сайыннарар уонна идэ таһымын үрдэтэр институкка үс күн устата барда. Учууталлар дьүүллүүр сүбэҕэ оҕону үөрэтиини, иитиини тэрийэр сатабылларын көрдөрдүлэр, төрөөбүт тыл уонна литэрэтиирэ уруогун, кылаас чааһын ыыттылар, маастар-кылаас көрдөрүлэр. Бу үлэ түмүгүнэн “Төрөөбүт тыл уонна литэрэтиирэ бастыҥ учуутала-2025” Бүтүн Арассыыйатааҕы идэ күрэһин өрөспүүбүлүкэтээҕи түһүмэҕин 8 лауреатын бэлиэтээтилэр. Бу туһунан Үөрэх уонна билим министиэристибэтин пресс-сулууспата иһитиннэрэр.