Rutube мобильнай сыһыарыыны AppStore маҕаһыыныттан соттулар

Арассыыйатааҕы Rutube видеохостинг мобильнай сыһыарыытын Apple хампаанньа AppStore маҕаһыыныттан үлэтин тохтоттулар. Бу туһунан Rutube платформатын ТГ-ханаалыгар биллэрдилэр.

Хампаанньаҕа бу АХШ хампаанньатын өттүттэн сааҥсыйалары киллэрбиттэринэн таҕыста диэн эттилэр.  Онуоха сыһыарыы күн бүгүнүгэр Google Play маҕаһыыныттан уһулла илик уонна хачайдаан ылыахха сөп. «Бүтэһик күннэргэ биһиги  сыһыарыыбытын хачайдааһыҥҥа рейтинг инники күөнүгэр сылдьыбыппыт, оттон билигин, хомойуох иһин, AppStore маҕаһыынтан соттулар», — диэн RuTube  бэрэстэбиитэллэрэ эттилэр уонна AppStore маҕаһыыныгар баар буоларга бары кыһамньыбытын ууруохпут диэн бэлиэтээтилэр. 

Санаттахха, бу иннинэ быйыл бэс ыйыгар RuTube сыһыарыы AppStore маҕаһыыныттан эмиэ сүтэ сылдьыбыта. Оттон кэлин хас да хонон баран онлайн-маҕаһыыҥҥа төнүннэриллибитэ.