С гепатиты утары охсуһуу нэдиэлэтэ саҕаланна

Кулун тутар 10-16 күннэригэр Арассыыйаҕа «С вирустаах хроническай гепатикка сыстыыны уонна тарҕатыыны утары охсуһуу нэдиэлэтэ» ыытыллар.

Тэрээһин нэһилиэнньэ ыарыыны сэрэтии, эрдэттэн быһаартарыы уонна кэмигэр эмтэнии туһунан билиитин кэҥэтэр аналлаах.

С вирустаах хроническай гепатит аан дойдуга барытыгар дьоһун суолталаах кыһалҕанан буолар. Доруобуйа бүтүн аан дойдутааҕы тэрилтэтин (ВОЗ) чахчытынан, 58 мөлүйүөнтэн тахса киһи С хроническай гепатиттаах.

Ростат 2024 сыл тохсунньу 1 күнүнээҕи чахчытынан, Арассыыйаҕа 5 500 000 аҕыйаҕа суох киһи ыалдьар. Бу дойду нэһилиэнньэтин 3,76%  ылар,  ол эбэтэр Арассыыйа хас биирдии 25-с киһитэ ыалдьарын кэриэтэ.

Онтон Саха сиригэр 2025 сыл тохсунньу 1 күнүнээҕи чахчынан, 5 848 киһи С вирустаах хроническай гепатиттаах, кинилэртэн 249 киһи ыалдьара 2024 сылга аан бастаан биллибитэ.