Саха сиригэр кулун тутар саҥатыгар -40 кыраадыска диэри тымныйыа

Кулун тутар бастакы күннэригэр Саха сиригэр эмискэ тымныылар түһүөхтэрэ. Өрөспүүбүлүкэҕэ салгын температурата эбии -10…-15 кыраадыс түһэрэ сабаҕаланар. Бу туһунан Саха сиринээҕи УГМС метеорологическай уонна агрометеорологическай отделын началынньыга Саргылана Никитина кэпсээтэ.

Бээтинсэҕэ диэри салгын температурата -14…-17 кыраадыс буолар. Оттон эспиэр этэринэн, бээтинсэҕэ Саха сирин хотугулуу-арҕаа уонна арҕаа өттүгэр эмискэ улаханнык тымнылар түһүөхтэрэ. Кулун тутар 1-2 күннэригэр соҕуруу уонна киин оройуоннарынан салгын температурата -35…-40 кыраадыска диэри тымныйар.

«Нэдиэлэ бүтүүтэ циклон кэтэх өттүттэн тымныы салгын киириэҕэ, онон эмискэ салгын температурата -10…-15 кыраадыс түһүөҕэ. Ити курдук сандал сааспыт бастакы күннэрэ тымныы күннэринэн көрсүөҕэ», — диэн Саргылана Никитина кэпсээтэ.