Саха сирин тирэх пууннара байыастарга бэлэхтэри туттараллар

Саха сирин тирэх пууннарын байыастара ДНӨ уонна ЛНӨ сиригэр бу күннэргэ Саха сириттэн сулууспалыы тиийбит биир дойдулаахтарын көрсө, байыаннай чаастарынан быстах кэмҥэ олохтуур пууннарга диэри тиийэргэ маршруттарын ахсаанын улаатыннардылар. Сүрүн бэлэҕинэн Кыайыы күнүгэр анаммыт бородуукта хомуурдарын туттараллар.

Бу туһунан ДНӨ Саха сирин тирэх пуунун бэрэстэбиитэлэ, военкор Владимир Укоев иһитиннэрдэ. Кини гуманитарнай көмөнү оҥорууга Саха сирин муниципальнай улуустарын дэлэгээссийэлэрэ улахан көмөнү оҥороллорун бэлиэтээтэ. «Зонаҕа бу күннэргэ Нерюнгри, Сунтаар, Хаҥалас уонна Үөһээ Дьааҥы улуустарын дэлэгээссийэлэрэ үлэлээтилэр. Байыастарга элбэх тиэхиньикэ, эбии оборудование, дьонноруттан аадырыстаах баһыылкалар бэрилиннилэр», — диэн кэпсээтэ военкор.

Кини Кыайыы күнүн иннинэ Саха сирин байыаннай сулууспалаахтарын уйулҕалара уонна бойобуой санаалара өрө көтөҕүллүүлээҕин бэлиэтээтэ, салалтаҕа уонна олохтоохторго мэлдьи болҕомто, өйөбүл оҥороллорун иһин махтанарын эттэ.

«Арассыыйа байыннайдара кимэн киириилэрэ саҕаламмытынан сибээстээн, тирэх пууннар экипажтарыгар саҥа маршруттар оҥоһуллаллар, чаастарбыт турар сирдэрэ чуолкайданаллар. Тирэх пууннар байыастара ыам ыйын 11 күнүгэр диэри бэлэхтэри тиэрдиини түмүктүөхтэрэ. Биһиги баазабыт штатнай эрэһииминэн үлэлиир, тиэхиньикэ үчүгэй», — диэн эбэн эттэ Владимир Укоев.

Санатан эттэххэ, Кыайыы күнүн көрсө анал байыаннай дьайыы сиригэр бэлэхтэри туттарыы тэрийиитин туһунан «Быһа сибээс» кэмигэр Ил Дархан Айсен Николаев кэпсээбитэ. Кини маннык көмө тиһигэ  2022 сылтан саҕаланан, көдьүүстээҕин көрдөрөн, бу үлэ салгыы барарын туһунан иһитиннэрбитэ.