Саахал мэдиссиинэтин киинин быраастара көмөнү оҥорууга бэлэмнэр

Саха сиринээҕи Саахал мэдиссиинэтин киинин үлэһиттэрэ «Путь воина» күрэхтэһиигэ көмөнү оҥорорго бэлэмнэр.

Саахал мэдиссиинэтин киинин гражданскай оборонаҕа уонна ыксаллаах быһыыга-майгыга исписэлииһэ Айталина Сильвестрова биригээдэ үлэтин туһунан кэпсээтэ: «Бу тэрээһиҥҥэ бүгүн 7 үрдүк квалификациялаах исписэлиистээх уонна суһал көмөнү оҥорор, толору хааччыллыылаах массыыналаах биир биригээдэ үлэлии сылдьар. Араас быһылаан тахсар түгэнигэр, көрөбүт уонна балыыһаҕа илдьии баар буоллаҕына, биһиги мантан (үөһээ мыраантан) түһэрэн, аллара баар суһал көмө массыынатыгар тиэрдиэхтээхпит. Биригээдэҕэ сарсыарда 7:00 чаастан киэһэ 20:00 чааска диэри дьуһуурустубалыыр. Педиатр, хирург, травматолог быраастар күн аайы сылдьаллар, оттон анестизиолог-реаниматолог, биэлсэр уонна суоппар күнүнэн уларыйаллар.  Биригээдэ үлэтин салайааччы буоларым быһыытынан бу үс күнү быһа мин сылдьабын».

Билиҥҥи кэмҥэ күрэхтэһии кыттааччыларын туруга бигэ. Айталина Ивановна этэринэн, ким даҕаны мэдиссиинэ көмөтүн ыла илик. Ол да буоллар, хамаанда көмөнү оҥорорго бэлэм.

«Путь воина» күрэхтэһиилэр салҕаналлар уонна Саахал мэдиссиинэтин сулууспата тэрээһин устатын тухары көмөнү оҥорорго, куттал суох буолуутун хааччыйарга бэлэм.

Күрэхтэһиилэр РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Илин Уһуктааҕы боломуочуйалаах бэрэстэбиитэлэ, «ВОИН» киин кэтээн көрөр сүбэтин бэрэссэдээтэлэ Юрий Трутнев сорудаҕынан, РФ снайпиҥҥа федерациятын өйөбүлүнэн  ыытыллаллар.