Саахымакка Бүтүн Арассыыйатааҕы Ил Дархан Куубагар турнир саҕаланна

Бүгүҥҥүттэн, кулун тутар 31 күнүттэн, Дьокуускайга уонна Покровскайга саахымакка Бүтүн Арассыыйатааҕы Ил Дархан Куубагар турнир саҕаланна.

Ол курдук, кулун тутар 31 күнүттэн муус устар 11 күнүгэр диэри Дьокуускайга уонна Покровскайга саахымакка Ил Дархан Куубагын турнира ыытыллар. Бириис пуондата — 2 мөл. солк. Быйыл Бүтүн Арассыыйа таһымнаах күрэх холбуу үс түһүмэҕинэн ыытыллар: эр дьоҥҥо саахымакка FONBET Арассыыйа Куубага, блиц успуорт күрэхтэһиилэрэ — «БЛИЦ Арассыыйа Гран-прита» уонна түргэн саахымакка «РАПИД Арассыыйа Гран-прита». Турнир кылаабынай судьуйатынан Бүтүн Арассыйатааҕы категориялаах судьуйа, норуоттар икки ардыларынааҕы арбитра уонна РФ бочуоттаах судьуйата Михаил Крюков үлэлиир.

«Биһиги өрөспүүбүлүкэбитигэр маннык саахымат култууратын сайыннарыыга уонна кыайыылары ситиһиигэ дьоһун суолталаах улахан тэрээһиннэр ыытыллалларынан киэн туттабыт», — диэн бэлиэтээтэ Ил Дархан Айсен Николаев.

Саха сирин саахымакка Федерациятын Бэрэсидьиэнэ Владимир Егоров этэринэн, Дьокуускайга спортсменнар үксүтэ кулун тутар 31 күнүгэр көтөн кэлиэхтэрэ.

Бүгүн Бурятия, Крым, Мордовия, Саха сирин, Краснодарскай, Приморскай, Хабаровскай кыраайдар, Москва, Москва уобалаһа, Новосибирскай, Ростовскай, Свердловскай уонна Челябинскай уобаластар бэрэстэбиитэллэрэ регистрацияланнылар.