Саахымакка Ил Дархан Куубагар аналлаах пресс-кэмпириэнсийэ буолла

Бүгүн, муус устар 4 күнүгэр, өрөспүүбүлүкэтээҕи медиа-кииҥҥэ саахымакка өрөспүүбүлүкэ Ил Дарханын Куубагар аналлаах  пресс-кэмпириэнсийэ буолла. 

Пресс-кэмпириэнсийэҕэ СӨ физическэй култуураҕа уонна успуорка миниистирин солбуйааччы Аида Антонова, СӨ саахымакка федерациятын бэрэсидьиэнэ Владимир Егоров, саахымакка өрөспүүбүлүкэ Ил Дарханын Куубагын сүрүн судьуйата Михаил Крюков, гроссмейстер, 2014 с.  Арассыыйа чөмпүйүөнэ, 2019 с. Европа чөмпүйүөнэ, тириэньэр, аналитик, Челябинскай уобаластан  Игорь Лысый кыттыыны ыллылар.

СӨ саахымакка федерациятын бэрэсидьиэнэ Владимир Егоров:

— Быйыл үһүс төгүлүн өрөспүүбүлкэ Ил Дарханын Куубагар күрэхтэһиибитин ыытабыт. 100 тахса күрэхтэһээччи кытынна, ол иһигэр блицка — 67, рапидка — 86, классикаҕа — 58 киһи кытынна. 14 эрэгийиэнтэн кыттааччылар бааллар. Швецияттан маастар кэллэ. Күрэхтэһии таһыма олус үрдүк, 9 гроссмейстер  кыттыыны ылла. Олор истэригэр Арассыыйа успуордун үтүөлээх  маастардара бааллар. Вадим Звягинцев, Игорь Лысый уонна Наталья Погонина курдук биллэр оонньооччулар кэлбиттэрэ, — диэн санаатын үллэһиннэ.

Бэлиэтээн суруйдахха, саахымакка өрөспүүбүлүкэ  Ил Дарханын Куубагын күрэхтэһиитэ  национальнай художественнай түмэлгэ  ыытыллыаҕа. Күрэхтэһиигэ киирии босхо дуу, төлөбүрдээх дуу диэн ыйытыыга түмэлгэ  киирбит киһи син биир хартыыналары көрөр, онон төлөбүрдээх диэн иһитиннэрдилэр.