Сааһын ситэ илик оҕоҕо холуобунай дьыала тэрийдилэр

ИДьМ Дьокуускай куорат 3-c №-дээх полиция дьуһуурунай чааһыгар тутуу хампаанньатын бэрэстэбиитэлэ үҥсүү түһэрбит.

Ол курдук биллибэт киһи Марха түөлбэтигэр баар  эбийиэктэн  тутуу инструменнарын уорбут. Хоромньу уопсай суумата 393 тыһ.солкуобайга тэҥнэспит. Суһал көрдөөһүн үлэ түмүгүнэн, сааһын ситэ илик оҕо тутуллубут. Уорбаланааччы ити эҥэр күүлэйдии сылдьан эбийиэк олбуоругар киирэн хатааһына суох ааннаах дьиэҕэ киирбит. Онно үс болгарка, сыбаарка аппараата, о.д.а инструменнар баалларын көрбүт уонна уоран ылбыт. Уоруллубут тэриллэр бары хаһаайыҥҥа төннөрүллүбүттэр. Салгыы полиция үлэһиттэрэ быһаарбыттарынан, уорбаланааччы өссө биир уорууга сыһыаннааҕа биллибит. Ол курдук, түүн Борисовка -2 оройуонугар  сылдьан тиэргэҥҥэ турар массыынаҕа кэлин аанынан киирэн магнитоланы уонна  аккумуляторы уорбут.  Хоромньу 12 тыһ. солкуобайга тэҥнэспит. Уорбут малын-салын кини ааһан иһэр билбэт киһитигэр атыылаабыт, ылбыт харчытын тус наадаларыгар туттубут.

Арассыыйа Федерациятын холуобунай кодексатын 158 ыст. 3 ч. «Уоруу» диэнинэн холуобунай дьыала тэриллибитин  ИДьМ пресс-сулууспата иһитиннэрэр.