Саамай сыстыганнаах гынан баран…

Билигин Арассыыйаҕа барытыгар кэриэтэ XFG («Стратус») коронавирус штамма тарҕанна.

Бу штамм аан бастаан былырыын Канадаҕа булуллубута,  Арассыыйаҕа ааспыт сайын ыалдьыбыттара. Билигин Роспотребнадзор иһитиннэриитинэн, ковиды үөскэтэр атын штаммнары бүтүннүү кэриэтэ баһыйбыт.

“Стратус” атыттартан уратыта диэн аһара сыстыганнаах. Иммунитеты билиммэт — урут ыалдьа сылдьыбыт инфекцияларгыттан хаалбыт көмүскэли тумнан ааһар, онон ковидтаабыт дьон хаттаан ыалдьыахтарын сөп.

Сүрүннээн күөмэйинэн, тыынар уорганнаргынан киирэр. Тыҥаҕа мээнэ тиийбэт, ол эрээри сыыстардахха тиийиэн сөп.

Сибикитэ атын ОРВИ-лартан уратыта суох: күөмэй, төбө ыалдьар, сөтөл киирэр, мурун уута саҕаланар, уопсай турук мөлтүүр, киһи 37-тэн 38,5°C диэри кыраадыстанар. Үгүс эмчит этэринэн саамай уратыта – киһи күөмэйэ хап-хааҕынас буолар, ардыгар быстах кэмҥэ саҥарар да кыаҕын сүтэрэр.

“Стратус” үөскүөҕүттэн COVID-19 күөмэйи, куолайы ыарытыннарар буолан, сезонунан кэлэр ОРВИ маарынныыр буолла уонна вирустаах сэбиргэхтэтиинэн ыалдьыыны намтатта.