Сааскы билгэлэри төһө билэҕин?

Сааскы кэмҥэ сыһыаннаах билгэлэри төһө билэҕит, дьиибэҕэ, кэтээн көрөөрүҥ эрэ.

— Саас тураах арҕаа диэки хайыһан олорон дааҕыргаатаҕына, хаар өтөрүнэн кэлбэт;

— саас уһуох буоллаҕына, курупааскы хааһа эрдэ кытарар;

— саас көмнөх хаара эрдэ түстэҕинэ, тыаллаах, уута суох саас буолар;

— саас көмнөх тыалтан буолбакка, итийэн, таммахтаан, күн уотун сылааһыттан көөрөттөн түстэҕинэ, өҥ сайын кэлэрин бэлиэтэ;

— саас көтөр үөрэ халыҥ буоллаҕына, саас көхтөөхтүк кэлэр;

— саас кымырдаҕас уйатын хаара күн көрөр өттүттэн ирдэҕинэ, сайына кылгас уонна хаҕыс буолар;

— саас хаар бытааннык ууллар буоллаҕына, сайына ардахтаах, ичигэс, хаһыҥа суох буолар;

— саас хаар түүн үөһүгэр диэри ууллар буоллаҕына, сайына сылаас уонна уһун буолар;

— саас хаар үрдүгэр тураах быта (былахы курдук хара ыстаҥалас) түһэр буоллаҕына, аһыҥалаах сайын буолар;

— саас хаар эрдэ хараардаҕына, ол кэннэ хара хапсыыр түстэҕинэ үүнээйи тахсыыта бытаарар;

— саас халлаан уһуннук хатаатаҕына, тииҥ үөскээбэт дьыла буолар;

— саас эрдэ этиҥэ суох аҥаардас чаҕылҕан эрэ чаҕылыйдаҕына, кураан сайын кэлэр;

— саас эрдэ ырыа чыычаах (маҕаас чыычаах) ыллаатаҕына, хатааһыннаах саас буолар;

— сааскы көтөр үөрдээбэккэ, икки-үс буолан сылдьар буоллаҕына, төрүөҕэ элбэх буолар;

— сааскы сарсыарда дьиэ таһыгар хаар чооруостара муһуннахтарына, хатааһыннаах саас буолар;

— сааһын этиҥ дохсуннук этэр буоллаҕына, үүнүүлээх сайын буолар.

(И.Сосин, И.Неустроев “Сахалыы күнү-дьылы билгэлээһиннэр” кинигэттэн).