Сааскы халаан уутуттан эмсэҕэлэбиттэргэ төлөбүрдэрэ түһэн эрэр

Бу сыл ыам ыйын 29 күнүн 15 чаастаах туругунан, ыксаллаах быһыы-майгы түмүгэр 3497 киһи, 857 олорор дьиэ эмсэҕэлээбитэ биллэр.

Биир кэмнээх матырыйаалынай көмө уонна ыксаллаах быһыы түмүгэр эмсэҕэлээбиттэргэ харчынан көмө көрүллүүтүгэр нэһилиэнньэттэн gosuslugi.ru судаарыстыбаннай өҥө порталынан сайабылыанньаны тутуу салҕанар.

Ыам ыйын 29 күнүн 15 чаастаах туругунан, 5574 сайабылыанньа киирдэ, ол иһигэр: биир кэмнээх матырыйаалынай көмөҕө – 2972, харчынан көмөҕө – 2602.

Өҥө 13 сайабылыанньанан оҥоһулунна: 12 киһи биир кэмнээх матырыйаалынай көмөнү, 1 киһи харчынан көмөнү ыллылар.

Санатан эттэххэ, ыйыллыбыт бэрээдэк быһыытынан ууга барбыттартан сайабылыанньалары бу сыл бэс ыйын 18 күнүгэр диэри ылаллар. Бу туһунан Экология, айылҕаны туһаныы уонна ойуур хаһаайыстыбатын министиэристибэтэ иһитиннэрэр.