Сааскы халаан уутуттан эмсэҕэлээбит Нам, Өлүөхүмэ улуустарын оҕолоро “Океан” оҕо киинигэр көттүлэр

Сааскы халаан уутуттан эмсэҕэлээбит Нам, Өлүөхүмэ улуустарын нэһилиэнньэлээх пууннарын оҕолоругар бүгүн үөрүүлээх күн буолла. Кинилэргэ Владивостокка – Бүтүн Арассыыйатааҕы “Океан” оҕо  киинигэр барар түгэн тосхойдо.

Бу сырыыга уопсайа 100 оҕо барар: Өлүөхүмэ улууһуттан 26, Нам улууһуттан 74 оҕо. Үгүстэр Владивосток курдук ыраах, сэргэх сиргэ аан маҥнайгытын бараллар. Бу сынньаныы, саҥаны билии-көрүү эрэ буолбатах, мантан оҕолор көрүүлэрэ кэҥиэҕэ, Арассыыйа атын муннуктарын оҕолорун кытта билсиэхтэрэ.

Бэйэтин алгыс тылын этэн туран оҕолору Үөрэх уонна билим миниистирин бастакы солбуйааччы Алевтина Петровна Аргунова атаарда.

Бэлиэтээн эттэххэ, Бүтүн Арассыыйатааҕы “Океан” оҕо киинигэр 8 симиэнэҕэ кубуотаны РФ Үөрэҕириитин министиэристибэтэ көрдө. Ахсыс симиэнэ – сыл саамай айымньылаах симиэнэтэ. Манна үөрэх куурустара, экология аахсыйалара, билим-быраактыка кэмпириэнсийэлэрэ, айар куонкурустар, идэҕэ эрдэттэн туһаайар сүбэлэр, сэһэргэһиилэр, “төгүрүк остуоллар”, “квест-оонньуулар, маастар-кылаастар, муода көрдөрүүтэ, лукбуктар куонкурустара, имперсивнай тыйаатырдар параадтара, айар бэстибээл, үҥкүү баттла, эрудит-оонньуу, уо.д.а. тэрээһиннэр ыытыллыахтара.

Бу үс нэдиэлэ оҕолорго умнуллубат бырааһынньыгынан буолуоҕа, бэйэлэрин кыахтарын арыйыахтара, кинилэр курдук биир умсугуйар көрүүлээх саҥа оҕолору кытта билсиэхтэрэ. Владивостоктан чаҕылхай, умнуллубат түгэннээх сынньанан кэлэллэригэр баҕарабыт!

Үөрэх уонна билим министиэристибэтин пресс-сулууспата.