Сааскылаахха алта дьиэни уонна сөмөлүөт түһэр балаһатын уу ылла

Анаабыр улууһугар уу таһыма үрдээн ыксаллаах быһыы-майгы эрэсиимэ олохтоммута.

Ол эрээри уу түһэр, балаһыанньа көнөн эрэр диэн бүгүн брифиҥҥэ СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков иһитиннэрдэ.

— Анаабыр улууһун Сааскылааҕар уустук балаһыанньа үөскээтэ. Сааскылаахха 11 ыал тиэргэнин, 6 олорор дьиэни, ол иһигэр биир чааһынай уонна  элбэх кыбартыыралаах 5 дьиэни уу ылла. 14 киһи быстах олорор сиргэ көһөрүлүннэ, атыттар аймахтарынан тарҕастылар. Итини таһынан аэропорт көтөр-түһэр балаһата ууга барда. Бөлүүн 3 чааска уу балайда түһэн, билигин кутталлаах таһымтан намтаата.

Бүгүҥҥү туругунан муус Өлүөнэ, Халыма, Яна, Индигирка өрүстэринэн устара бэлиэтэнэр. Уу таһыма барыларыгар кэминэн.