Сааскылаана Эверстова: «Ыкса билсэ, сибээстэһэ олоробут»

Чурапчытааҕы аграрнай-техническэй кэллиэс аграрнай отделениетын педагогическай кэлэктиибин профкомун чилиэнэ, преподаватель Сааскылаана Федоровна Эверстова байыаннай эпэрээссийэҕэ кытта сылдьар кэллиэгэлэригэр, кинилэр дьиэ кэргэттэригэр кэллиэс аграрнай отделениетын көмөтүн туһунан кэпсээтэ.

— Чурапчытааҕы аграрнай-техническэй кэллиэс аграрнай отделениетыттан, Одьулуун нэһилиэгиттэн икки үлэһиппит Эдуард К. уонна Альберт А. балаҕан ыйын бүтүүтэ байыаннай эпэрээссийэҕэ ыҥырыллан барбыттара. Аграрнай отделение салайааччыта Петр Степанович Баягантаев кэллиэгэлэрбитин кытта билсэ олорор. Туох наада диэн буолла даҕаны, биһиэхэ ыйан-кэрдэн биэрэр. Баралларыгар олохтоох дьаһалта иннигэр нэһилиэгинэн мустан атаарбыппыт. Обмундирование ылыналларыгар хаста да харчы хомуйан ыыппыппыт. Кинилэр дьиэ кэргэттэрин кытта быһа сибээскэ олоробут. Ол курдук, күһүн муҥха балыгынан көмөлөспүппүт, муус ылан, саас мууһу уган биэрбиппит. Баанньыкка, гарааска уокка оттор мас бэлэмнээһинэ, хаар күрдьүүтэ курдук үлэлэргэ көмө оҥоһуллар. Эттэхтэринэ, иитээччи Екатерина Михайловна Ефимова отделениебыт оҕолорун, эдэр үлэһиттэри кытта баран уу куттарыытыгар, сыбаалкаҕа бөх илдьиитигэр, хаар күрдьүүтүгэр, муус сааһылааһыныгар, киллэриитигэр көмөлөһөллөр.
Эдуард К. ветеринария биридимиэтигэр үөрэтэр преподаватель, профкоммут салайааччыта, оттон Альберт А. тэрилтэбит суоппара. Эдуард кэргэнэ Күннэй Романовна оскуолаҕа үлэлиир. Альберт кэргэнэ Анастасия — устудьуон. Кинилэргэ туох наада буолла да, көмөлөһө, билсэ турабыт, өрүү сибээскэ баарбыт. Соторутааҕыта Альберт илиитэ ыалдьан, Москванан Уссурийскайга ааһан иһэрин кулууппут дириэктэрэ ити кэмҥэ Москваҕа баар буолан, көрсүбүтэ. Аҥар илиитэ иһэн хаалбытын көрдөрөрүгэр томографияҕа харчы наада диэн, профкомунан бары харчы хомуйан ыыппыппыт. Аҕа дойдуну көмүскээччилэр күннэригэр бу уолаттарбытыгар кыра харчынан бэлэх оҥорбуппут. «Сайдыс» кулууп дириэктэрэ Аржакова Валентина Леонидовна ыҥырыытыгар кыттыһан, нэһилиэк дьахталлара мустаммыт, байыаннай усулуобуйаҕа табыгастаах олбох тигэн ыыппыппыт.
Нэһилиэктэн байыаннай эпэрээссийэҕэ кытта сылдьар уолаттар элбэхтэр. Олортон биһиги кэлэктиип Михаил М. дьонугар көмөлөһөр. Констансия Константиновна уонна Станислав Афанасьевич устудьуон оҕолору илдьэ хаһаайыстыба үлэлэригэр көмөлөһө тураллар. Тибиилээх саас буолан кыра оҕолоох дьон тэлгэһэриттэн да тахсаллара боппуруос, онон хаар күрдьүүтүгэр быйыл үлэ элбэх. История учуутала Павлов Иван Дмитриевич хаста да хаар күрдьүүтүгэр уолаттары салайан илдьэ сырытта. Түгэни туһанаммын көмөлөһөр дьоҥҥо барыларыгар, Никулин Илья, Никифоров Айаал, Листиков Стёпа, Рожин Эльдар курдук көхтөөх устудьуон оҕолорбутугар профком аатыттан махталбытын биллэрэбит. Дьоммутун-сэргэбитин кытта ыкса сибээһи тутан олоробут.