Сабантуйга 50 тыһыынча кэриҥэ киһи сырытта

Комсомольскай болуоссакка буолбут Федеральнай Сабантуйга 50 тыһыынча  кэриҥэ киһи сырытта. 

Татарстаан Өрөспүүбүлүкэтин Раиһа Рустам Миннихановы кытта Ил Дархан Айсен Николаев бырааһынньыктыы киэргэммит болуоссаты көрдүлэр, экспозициялары билистилэр, култуурунай бырагыраама кыттыылаахтарыныын кэпсэттилэр.

“Татарстаантан кэлбит ыалдьыттары кытта маннааҕы бэйэбит олохтоох, XVIII үйэҕэ кэлбит татаардар бэйэлэрин үгэстэрин, култуураларын көрдөрдүлэр. Оҥоһуктарынан, ырыаларынан, астарынан-үөллэринэн, быыстапкаларынан бэйэлэрин тустарынан, Хоту сиргэ хайдах силистэрин-мутуктарын, үгэстэрин тутан олороллорун кэпсээтилэр. Маннык сабыытыйалар норуоттары бэйэ-бэйэҕэ чугаһаталлар, хардарыта ытыктабылы үөскэтэллэр”, — диэн бэлиэтээтэ Ил Дархан.

Тэрийээччилэр куорат олохтоохторун, ыалдьыттарын өттүттэн бырааһынньыкка улахан интэриэс баарын бэлиэтээтилэр, Сабантуйга кыттыбыт хас биирдии киһиэхэ махталларын тиэртилэр, диэн иһитиннэрэр Идл Дархан, бырабыыталыстыба пресс-сулууспата.