Сабантуйга курдаах тустуу кыайыылааҕа Миннихановтан массыына бирииһи тутуоҕа

Бэс ыйыгар Дьокуускайга федеральнай таһымнаах Сабантуй — татаардар сүрүн бырааһынньыктара ыытыллыаҕа. Бырааһынньык иитинэн куреш тустууга күрэхтэһии буолуоҕа. Манна кыайыылаах массыынанан наҕараадаланыаҕа.

«Бырааһынньык бэс ыйын 13-14 күннэригэр Комсомольскай болуоссакка, ол аттынааҕы сиргэ уонна пааркаҕа ыытыллыаҕа. Дьокуускайга ыытыллар Сабантуй умнуллубаттык ааһыаҕа диэн тэрийээччилэр эрэннэрэллэр. Быыстапкалары, куонкурустары таһынан спортивнай күрэхтэһиилэр буолуохтара. Курдаах тустууга — курешка кыайбыт боотур Татарстаан баһылыга Рустам Миннихановтан сүрүн бирииһи — «Лада Гранта» массыынаны бириис ылыаҕа», — диэн Дьокуускай баһылыга Евгений Григорьев телеграм-ханаалыгар иһитиннэрдэ.