Сабантуйга маастар-кылаас ыыттылар

Комсомольскай болуоссакка буолбут федеральнай Сабантуйга татаар ыалларын олоҕун-дьаһаҕын көрдөрөр быыстапкалар киһи болҕомтотун тардар гына тэриллибиттэр.

Хас биирдии дьиэ хаһаайына бэйэтин ураты дьарыгын көрдөрөн, маастар-кылааһы ыытта. Сабантуйга татаар омук олоҕун-дьаһаҕын көрдөрөр ыал дьиэлэриттэн биирдэстэрин хаһаайката  Гульфиза Сахабиева хаас түүтүттэн сыттыгы оҥорорун таһынан, бурдук аһы астыырга хаас куорсунунан арыыны биһэргэ  туттуллар тэрили  оҥорон көрдөрдө.

— Бу тэрээһиҥҥэ биһиги ыйы быһа бэлэмнэммиппит. Татаар ыалларын олоҕун-дьаһаҕын көрдөрүүгэ туруохтаах тээбириннэри, тэриллэри барытын араас түмэллэртэн хомуйан, тутуу матырыйаалын кытта тэҥҥэ Дьокуускайга айанныыр улахан массыынаҕа уган ыыппыппыт. Манна мин хаас түүтүттэн сыттык оҥорууну уонна ас астыырга туттуллар хаас куорсунунан киистэни оҥорон көрдөрдүм.

Биһиэхэ булт аһыттан туох барыта туһаҕа барар, — диэн бэлиэтээтэ Гульфиза Сахабиева.